Asteazken honetan, azaroaren 26an, hasi egin da Sestaoko Txabarri kaleko 37. eta 39. eraikinen eraisketa, joan den astelehenean Udalak eraikin horiek hur-hurreko aurritzat jo eta gero. Kolapso-arriskua egiaztatu zen, oinezkoen eta inguruko blokeetako biztanleen segurtasuna arriskuan jartzen zuena.
Ebazpen horren ondorioz, Sestao Berri sozietate publikoak atzo, asteartea, hasi zituen zenbait aste iraungo duten eraispen-lanak.
Ehun urtetik gorako bi eraikin dira, lau solairu eta txapitula dituztenak, eta Txabarri-El Soleko Hiri eta Gizarte Birgaitze Planen barruan aurreikusita zegoen biak eraistea. Hori dela eta, Sestao Berri sozietate publikoak berak hainbat urte daramatza jabetza guztiak pixkanaka eskuratzen, etxebizitza duin eta seguruekin ordezkatzea errazteko.Gaur egun, Udala 37. zenbakiko eraikinaren % 100aren titularra da, eta Sestao Berri sozietate publikoak 39. zenbakiaren % 75 du, eta azken horren % 25 soilik da jabetza pribatua. Testuinguru horretan, Udalak eta Sestao Berrik bi orubeen hirigintza-birpartzelazioa eskatuko dute, lurzatien % 100aren titulartasun osoa beren gain hartzeko.
Sestao Berrik hilabete honetan aurkeztutako hirigintza-txosten batek bi eraikinen egiturazko narriadura larriaz ohartarazi izanak eragin du eraispen-lanak berehala hastea. Inguru horretan eginiko ikusketa-teknikoaren ondorego azterlanaren arabera, "kolapso partziala edo erabatekoa izateko benetako arriskua dago, eta bat-batean gerta daiteke, batez ere bide publikorako hegaletan eta fatxadetan. Mehatxu horrek aldameneko eraikinak eta oinezkoen joan-etorriak ere arriskuan jartzen ditu, eta berehalako ezbeharra eragin lezake".
Jarduketa honekin, dagoeneko 47 eraikin eraitsi dira Sestaoko beheko aldean 2005ean Txabarri-El Sol, Urbinaga, Rivas eta Simondrogas inguruetako hiri- eta gizarte-berroneratze prozesu integrala hasi zenetik.
Orain hutsik geratuko diren orubeetan alokairu sozialeko etxebizitzak eraikiko dira, Eusko Jaurlaritzako Etxebizitza eta Hiri Agenda Sailak, Sestaoko Udalak eta Sestao Berrik berak sinatutako hitzarmenari jarraiki. Horrela, eremu hori auzo seguruagoa, modernoagoa eta bizigarriagoa bihurtzeko helburu partekatuan aurrera egingo da.
Horretarako, Eusko Jaurlaritzak beharrezko funts ekonomikoak jarri ditu obrak Sestao Berrik lizitatu ditzan.
