Astelehen honetan hasi eta azaroaren 24ra bitartean indarrean egongo da Galdakaon Bono Denda programaren edizio berria. Aurreko edizioek izandako arrakasta kontuan izanda, Gu Dendari merkatari elkarteak ekimen honen edizio berri bat martxan jartzeko erabakia hartu du, tokiko merkataritza sustatzeko helburua duena.

Egun horretatik aurrera bonuek ez dute baliorik izango. Guztira 10.000 bono jaulkiko dira, bakoitza 15 euroko balioarekin, eta 10 euroren truke eskuratu ahal izango dira. Beraz, herritarrek 5 euroko deskontu zuzena izango dute parte hartzen duten establezimenduetan egindako erosketetan.

Pertsona bakoitzak gehienez 4 bonu eskuratu ahal izango ditu, eta gehienez 8 erabili ahal izango dira erosketa bakoitzeko. 65 urtetik gorako pertsonek bonuak aurrez aurre erosi ahal izango dituzte, Gu Dendariren bulegoan (Muguru plaza), azaroaren 3tik aurrera, 09:00ak eta 14:00ak artean, bonuak agortu arte. Gainera, adin bereko beste pertsona baten bonuak ere eros ditzakete, bi NANak aurkeztuta. Gainerako herritarrek webgunearen bidez erosi ahal izango dituzte, egun eta ordutegi berean hasita.

Webgunean bertan, kanpainan parte hartzen duten establezimenduen zerrenda kontsultatu eta baldintza orokorrak ezagutu ahal izango dira. Horien artean, bonuak behin bakarrik erabili ahal izango direla eta ez direla diruz trukagarriak nabarmentzekoa da. Halaber, ez dira onartuko hondatuta edo epez kanpo entregatutako bonuak, eta produkturen bat itzultzen bada, establezimenduak erosketaren zenbateko beraren balioa duen txartela emango du dirua bueltatu beharrean.

Kanpaina berezi honen bidez, Udalak bertako merkatariei lagundu eta gertuko kontsumo arduratsua sustatu nahi du, Galdakaoko ekonomia sendotuz eta auzokideen eta merkatarien arteko lotura indartuz.