Martxan da Bizkaiko startupen ekosistema bultzatzeko tokiko ekintzailetzaren erreferenteak konektatzen dituen sarea

Ekintzailetzan erreferente diren sei pertsonak osatzen dute B Founders Club berriaren talde sustatzailea. Ekimen hori BAT B Accelerator Tower-en eskutik sortu da, startup arrakastatsuen sortzaileak biltzeko, eta horrela, Bizkaiko ekosistema ekintzailea indartuko duten esperientziak partekatzeko, ezagutza sortzeko eta ekintzak sustatzeko. Talde sustatzailea honako hauek osatzen dute: Fernando Bacaicoa, Grupo Educaedu-ren sortzailea; Eneko Knörr, serieko ekintzailea (Hostalia, Ideateca, Ludei, Stabolut) eta startupetako inbertitzailea; Gurutz Linazasoro, VIVEbiotech erakundearen sortzailea eta presidente exekutiboa; Ander Michelena, Acurio Ventures-en bazkide sortzailea eta Ticketbis-en sortzaileetako bat; Oier Urrutia, Lookiero-ren sortzailea eta CEOa; eta Iratxe Zuluaga, Ariadna Grid eta Merytronic-en CEOa.

B Founders Club erreferentziazko sare gisa sortu zen, helburu hauei begira: tokiko kasu arrakastatsuak ikusaraztea, ekintzaileen arteko lankidetza sustatzea eta belaunaldi berrientzako inspirazio-iturria izatea. Horrela, Bizkaia sortu, hazi eta inbertitzeko lurralde erakargarri gisa finkatzen lagunduko da.

BAT B Accelerator Tower-ek bultzatutako ekimena

Proiektua BAT, B Accelerator Tower-ek sustatzen du, hau da, Bizkaiko Ekintzailetzaren Nazioarteko Zentroak. BAT Bizkaia Dorrean dago kokatua eta Bizkaiko Foru Aldundiak eta Bilboko Udalak sustatu dute, Eusko Jaurlaritzarekin lankidetzan. BAT nazioarteko erreferentziako hub gisa finkatu da, eta startupak, korporazioak, inbertitzaileak, zentro teknologikoak, unibertsitateak eta mundu osoko erakunde publikoak konektatzen ditu. Haren helburua da berrikuntza sustatzea eta Bizkaiko eta Euskadiko enpresa-sarea indartu eta berrituko duten negozio berriak bultzatzea, nazioarteko talentua erakartzeaz eta lurraldearekin lotzeaz gainera. Une honetan, 214 erakunde daude komunitate horretan, eta haietatik 114 startup dira. Denen artean berrikuntza irekia, garapen teknologikoa eta enpresen lehiakortasuna sustatzen dute. BAT sortu zenetik, hainbat arlo uztartzen dituen eredu bat finkatu du: inkubazio- eta azelerazio-programak, networking-jarduerak, finantzaketa eskuratzea, nazioarteko konexioa mundu osoko 140 ekintzailetzako hub baino gehiagorekin eta startupei laguntzeko zerbitzu espezializatuak.

Inspirazio, ezagutza eta ekintzarako gune bat

B Founders Club ezagutzaren eta lankidetzaren foro aktibo gisa egituratzen da. Foro horretan, esperientzia handiena duten fundatzaileek ikaskuntzak eta jardunbide egokiak partekatuko dituzte hazten ari diren proiektuen buru diren ekintzaileekin.

Klubak bi parte-hartze maila ditu:

• Successful Founders Committee: finkatuta dauden eta bost milioi euro baino gehiago inbertitu edo fakturatu duten startupen sei fundatzaileek osatzen dute.
• B Founders: gutxienez 500.000 euroko inbertsio profesionaleko txanda bat egin edo azken hiru urteetan fakturazioan milioi bat eurotik gorako inbertsioa egin duten ekintzaileek osatua.

Klubak ezagutza transferituko du, ekosistema hazteko behar diren palankak detektatuko ditu, eta proposamen eta gogoetak helaraziko dizkie erakunde publiko, korporazio eta inbertitzaileei, Bizkaiko ekintzailetza-sarea indartzen jarraitzeko.

Kide berrientzako deialdia

Talde sustatzailea eratu ondoren, deialdi bat ireki da, startup bazkideak B Founders lehenengo bazkide-taldean sartzeko. B Founders-en lehenengo bilera abenduaren 1ean egingo da, BAT Dorrean. Interesa duten enpresek BATen web-orriaren bidez eman ahal dute izena.

B Founders Club sortuta, Bizkaiak aurrera egiten du ekintzailetzarekin, berrikuntzarekin eta talentuarekin duen konpromisoan, eta pertsona fundatzaileen komunitatea sendotzen du, lurraldea ekintzailetza aurreratuaren nazioarteko erreferente bihurtzeko asmoz.