Sestaoko Udalak 176.000 euroko aurrekontua bideratuko du hasi berri den ikasturterako eskola-beken deialdi berria abiarazteko. Dirulaguntza hori ikasturteko gastuei aurre egin ahal izateko laguntza handia da familientzat. Programa honen bidez, 150 haur jasoko dute laguntza eskola-jantokira joateko, eta 146 testuliburuak eta eskola-materiala erosteko.
Gizarte Ekintza eta Berdintasun zinegotziak, Yosune Serapio, azaldu duenez, ekimen honen helburua “haurren hezkuntzarako eskubidea babestea, gure udalerriko familia ahulenenei jantokiaren eta eskola-materialaren gastuei aurre egiten lagunduz” da. Irailean Gizarte Ekintza Sailak lan handia izaten du ekimen honekin.
Beken sistemaren bidez, udalak dirua aurreratzen du familiek eskola-materialaren erosketari eta jantokiko gastuei aurre egin ahal izateko. Ondoren, udalak diruaren zati bat berreskuratuko du, haur onuradun guztiek Eusko Jaurlaritzako beka eskaera egin behar baitute.
Testuliburuak eta eskola-materiala erosteko beken atalean, administrazioak 191 eskaera jaso ditu, eta horietatik 146 onartu eta 45 ezetsi dira, familiaren diru-sarrerak oinarrietan ezarritako mugak gainditzen zituztelako, dokumentazioa garaiz aurkeztu ez zutelako edo eskaera epearen ondoren aurkeztu zutelako. Kasu honetan, udalak txartel bat ematen dio beka jasotzen duen haur bakoitzari, eta hori erabili ahal izango du bere ikastetxean edo liburu-dendan eskola-materiala ordaintzeko. Programa honen kostua 22.000 euro ingurukoa izango da udalaren kontuetarako.
Bestalde, eskola-jantokiko gastuak ordaintzeko beken deialdian 194 eskaera jaso dira, eta horietatik 150 onartu eta 44 ezetsi dira, aurreko kasuan bezala, familiaren diru-sarrerak oinarrietan ezarritako mugak gainditzeagatik, dokumentazioa garaiz ez aurkezteagatik edo eskaera epearen ondoren egoteagatik. Azpimarratzekoa da, jantokiaren kostua ikastetxearen arabera aldatzen bada ere, udalak ez duela bereizketarik egiten eta familia bakoitzari dagokion zenbatekoa osorik ordaintzen diola. Horrela, tokiko administrazioak 154.173 euro inbertituko ditu familiek zerbitzu hori ordaindu ahal izateko.
