Herri bakoitzaren ondarea bizirik dagoen bere historiaren zati bat da; horren nortasun kolektiboa nola eraiki den kontatzen du, eta izan dituen borroken eta forma eman dioten erabakien berri ematen du. Ikuspegi horretan sakontzeko asmoz, Galdakaok Europako Ondarearen XXV. Jardunaldiekin bat egin du aurten ere, tokiko bizimodua definitu duten eraikin eta espazioen bitartez gure historia berraurkitzeko gonbidapen irekia.
Aurten ‘25 urte kultura eraikitzen’ leloa darama, eta aste honetan aurkeztu dute ekimena Edurne Espilla jarduneko alkate eta Kultura zinegotziak, Jesus Muñiz galdakoztar historialariak eta Laura Moreno Kultura Saileko udal teknikariak.
Espillak adierazi duenez, jardunaldien helburua da “eguneroko bizitzaren parte diren, baina sarritan beren historia ezagutzen ez dugun espazio horiek fokuan jartzea”. Horregatik, “ondarea ezagutu, babestu eta transmititzearen garrantzia” azpimarratu du, iraganaren memoria gordetzeko ez ezik, gure ingurunearekiko lotura sendotzeko tresna gisa ere bai.
Ildo horretan, hil honetan zehar Galdakaoko bi espazio berezi barrutik ezagutzeko bisita gidatuak egingo direla jakinarazi du: Andra Mari eliza eta Dinamita fabrikarekin lotutako eraikinak. Nabarmendu ditu Zuhatzun, Arkotxan, Plazakoetxen eta Tximelarren fabrikako langileentzat eraiki ziren etxebizitzak, eskola, ekonomatoa, kapera eta eraikin desberdinak: “jende asko aitite eta amamak bisitatzera joaten da Viktor Anaia kaleko erresidentzietara, baina eraikin horien atzean dagoen historia jakin gabe”, esan du.
Bestalde, Muñizek azaldu duenez, “bi espazio berezi dira, jende gehienak gutxi ezagutzen dituenak”. Alde batetik, Andra Mari eliza “bitxi arkitektoniko bat da, XIII. eta XVI. mendeko estiloak batzen dituena, Euskal Herrian oso ohikoa ez dena”. Eta, bestetik, Dinamita fabrikarekin lotutako etxebizitza eta ekipamendu multzoa, “ezohikoa delako eraikin gehienak mantendu izana; hori ez da sarritan gertatzen”. Kasu honetan, publikoarentzat normalean itxita egoten diren instalazioak bisitatu ahal izango dira, hala nola fabrikako sarrera edo bulegoak.
Bisitak egiteko aurretiko izen ematea beharrezkoa izango da, plazak mugatuak baitira, esperientzia aberasgarria eta erosoa bermatzeko. Inskripzioa 944 010 598 telefonora deituta (astelehenetik ostiralera, 09:00etatik 14:00etara) edo mgarrido@galdakao.eus helbidera idatzita egin daiteke.
Galdakaoko Udalak herritarrak eta bisitariak animatzen ditu jardunaldi hauetan parte hartzera, tokiko ondarea hobeto ezagutzeko, historia duten espazioak berreskuratzeko eta askotan oharkabean pasatzen diren elementuei balioa emateko aukera paregabea baita.
