Ostegun honetan goizean, uztailaren 10ean, Bizkaiko Foru Aldundiak eta Abanto Zierbenako Udalak lankidetza-hitzarmen bat sinatu dute udalerrian BiziPark berri bat eraikitzeko. Horretarako, Aldundiak 50.000 euroko dirulaguntza emango du, lanen % 100-a finantzatzeko. Instalazio berria Doctor Areilza kaleko lur gaineko aparkalekuaren berdegunean kokatuko da, Gallartan, eta gutxienez 24 bizikletarentzat izango du espazioa.
Sonia Perez Ezquerra Garraioak, Mugikortasuna eta Turismoa Sustatzeko diputatuak azpimarratu duenez, "BiziPark hau aparkaleku bat baino askoz gehiago da: bizikleta bidezko garraio publikoaren logikatik eraikitzen ari garen sare baten parte da, egunerokorako azpiegitura irisgarri, seguru eta erabilgarriekin".
"Foru Aldunditik mugikortasun publiko deskarbonizatuaren aldeko apustua egiten dugu, eta horrek sistema intermodal baten ardatz estrategiko gisa hartzen du bizikleta. Gero eta pertsona gehiagok autoa utzi, bizikleta beste garraiobide batzuekin konbinatu eta modu osasungarri, eroso eta arduratsuan mugitu ahal izatea nahi dugu ", adierazi du.
Bestalde, Abanto-Zierbenako alkate Iñaki Urrutiak adierazi duenez, "BiziPark berri honek bat egiten du Udaletik bizi-kalitatea hobetzeko eta ohitura jasangarriagoak sustatzeko bultzatzen ari garen ekintzekin. Gallartan eta Abanto-Zierbena osoan bizikletaz ibiltzea erraza eta segurua izatea nahi dugu ".
"Aldundiaren babesa funtsezkoa izan da urrats hau emateko eta gure herritarrei ibilgailu pribatuaren alternatiba erreala eskaintzeko eguneroko ibilbideetan", gaineratu du Urrutiak.
Lurralde osoan hazten ari den BiziPark sarea
Bizkaiko BiziPark sarea aparkaleku estaliek eta bizikleta partikularrentzako aseguruek osatzen dute, eta hazten jarraitzen du, Aldundiko Mugikortasun Zuzendaritzaren estrategia integralaren barruan. Gaur egun, 15 instalazio operatibo edo garatzen ari dira Ermua, Abadiño, Barakaldo, Bermeo, Derio, Güeñes-Sodupe, Zalla, Portugalete, Berango, Trapagaran, Durango, Gorliz, Santurtzi, Sestao eta Getxo udalerrietan, eta horiei Abanto-Zierbena gehitu behar zaie.
Aurreikuspenen arabera, 500 plaza seguruak izango dira 2025. urtearen amaieran, eta 700 izatera iritsiko dira legegintzaldia amaitu baino lehen. BiziPark guztiak Foru Aldundiak finantzatzen ditu oso-osorik, instalazio bakoitzeko 50.000 eta 75.000 euro bitarteko batez besteko inbertsioarekin.
BiziParken hedapena beste proiektu estrategiko batzuekin osatzen da:
- Partekatutako bizikleten BizkaiBizi sistema publikoa, 2,5 milioi ibilbide baino gehiago izan dituena 2023ko urritik.
- BiziPunto geltokiak, bizikletak 110 puntu baino gehiagotan konpondu, mantendu eta puzteko aukera ematen dutenak.
- Etorkizuneko bizikleta-bideen sarea, 350 kilometro baino gehiagoko ibilbide berdeekin, lurralde osoan planifikatzeko edo gauzatzeko.
Azpiegitura horrekin, Abanto-Zierbena bizikletaz mugitzeko sare batean sartu da, lurraldekohesioa eta deskarbonizazioa indartzen dituena, eta erakundeek eta herritarrek eredu osasungarriago, eraginkorrago eta iraunkorrago baten alde duten konpromisoari erantzuten diona.
