1936ko irailetik 1937ko ekainera bitartean Sestaon leku izan zuten 14 bonbardaketan hildako 35 bizilagunak omentzeko Memoria Historikoaren oinezkoentzako ibilbidea inauguratu du Sestaoko Udalak. Ibilbidea Gerra Zibilak udalerrian izan zuen gertakari historikoaren berri ematen duten 16 totemez osatuta dago.
Idulki horiek udalerriko puntu hauetan daude: Sorospen Gela, Urbinaga Plaza, Errebontza Ikastetxe zaharra, Rebonza Egoitza, Kuetoko Gurutzea, Lorenzo Llona Zeharbidea, Musika Eskola, La Iberia kaleko zinema zaharra, Venta del Gallo, Bizkaiko Labe Garaietako aireko babeslekua, Cueva Negraren aterpea, La Unión Taldearen 10. zenbakia, Vista Alegre Taldeko Eskribauaren Etxea, Vista Alegre ikastetxea, Vicente Díez plaza eta Arkuaren Etxea.
Memoria Historikoaren ibilbidea seinaleztatzeko totem eta idulki horiek instalatzea Turismo Jasangarrirako 2023ko Planean/2023ko Plan Nazionalean (Eguzkia eta hondartza Turismo Urdina) jasotako proiektuetako bat da, eta Sestao turismo industrialeko berrikuntzako Hub gisa sendotzea du helburu.
Helburu hori lortzeko, Eusko Jaurlaritzak Europar Batasuneko Next Funtsen 2.160.000 euroko dirulaguntza eman dio Udalari. Jarduera zehatz horren kostu ekonomikoa 40.000 eurokoa izan da.
Udalaren enkarguz, Sestao Berri sozietate publikoak kudeatu du totemak eta idulkiak diseinatu, fabrikatu eta jartzea. Gogoan Sestao Elkarteak, bestalde, parte hartu du ekimen honetan, testu eta argazki zaharrak egiteko informazioa emanez, eta totem eta idulki guztietan bere logotipoa agertu da.
Ekitaldian parte hartu dute Gorka Álvarez Sestaoko alkateak, Fernando Martínez Memoria Demokratikorako Estatu idazkariak, Javier Hurtado Eusko Jaurlaritzako Turismo, Merkataritza eta Kontsumo sailburuak, María Jesús San José Eusko Jaurlaritzako Justizia eta Giza Eskubideetako sailburuak eta Gogoan Sestao Elkarteko zenbait kidek. Ekitaldia Carlos García de Andoin Kultura eta Memoria Historikoko zinegotziak zuzendu zuen, eta alderdi politiko guztietako ordezkariak bertaratu ziren. Ekitaldia amaitzeko, lore eskaintza egin zioten errepublikarren lehen udal korporazioari.
