'La fábrica de yute de Ugao-Miraballes: el papel de la mujer en la fábrica' izeneko liburua aurkeztuko dute datorren asteazkenean, martxoaren 12an, Udiarragako Andra Mariren baselizan. Ekitaldia arratsaldeko 18:00etan hasiko da, eta urte luzez herriko Yute fabrikan lan egin zuten emakumeei omenaldia egingo zaie.
Liburu hau Ugao-Miraballesko Hiribilduko Historia Ikertzeko Bekaren esparruan egindako ikerketa baten emaitza da. Udalak 2023an sustatutako beka honen bidezidatzitako lan honek yutearen emakumezko langileen historia ahanzturatik berreskuratu eta herriko bizitza sozialari eta ekonomiari egindako ekarpena balioan jarri nahi du.
Ekitaldian Ekaitz Mentxakak, Ugao-Miraballesko alkateak, parte hartuko du, eta emakume hauek udalerriaren garapenean izan duten funtsezko papera goraipatu eta euren oroimena berreskuratzearen garrantzia azpimarratuko du. "Hamarkada askotan, yute fabrikako emakumeek itzalean lan egin zuten, merezi zuten esker onik gabe.
Liburuarekin eta gaur ekitaldiarekin, Ugao-Miraballesen historian dagokien lekua eman nahi diegu eta egindako ahalegina eta sakrifizioa eskertu", nabarmendu du Mentxakak.
Susana Serrano, Euskal Herriko Unibertsitateko irakasle titularra eta Josu Hernando Pérez, Euskal Herriko Unibertsitateko irakaslea eta liburuaren egilea, izango dira liburuaren eta haren sorkuntza-prozesuaren aurkezpenaz arduratuko direnak. Historia partekatu honi aitortza egiteko, Udalak Javier Gandarillas Antiza artistak egindako lantegiaren akuarela-lamina jasoko du.
Ekitaldiaren unerik hunkigarrienetako bat lantegiko emakume langileen omenaldia izango da, horietako asko Ugao-Miraballesko eta inguruko udalerrietako bizilagunak. Bertaratutakoen txalo beroaz gain, liburuaren ale bat eta oroigarri-lamina bana jasoko dute, beren lanaren eta dedikazioaren aitortza gisa. Ekitaldia Sarea Abesbatzaren eta Etorki Dantza Taldearen emanaldiek girotuko dute, memoria kolektiboaren ospakizun honi ukitu artistiko eta sinbolikoa emanez.
Ekimen honek Udalaren konpromisoa berresten du, herriaren garapenean funtsezkoak izan diren emakumeen historia ikusarazi eta aitortzeko. “Etorkizun justu eta berdintsu bat eraikitzeko, ezinbestekoa da gure aurrekoek izan zuten papera aitortzea. Omenaldi honekin, inoiz galdu behar ez zituzten ahotsa eta lekua itzuli nahi dizkiegu", adierazi du Mentxakak.
Ekitaldi hau ugaotarrentzat ere aukera paregabea da beren historiara hurbiltzeko. Horregatik, Udalak herritar guztiak gonbidatzen ditu memoria eta aitortzaren ekitaldi honetan parte hartzera, omenaldi bidezko eta beharrezko honekin bat eginez.
