Ezkurdi aretoak 2025eko erakusketa-programa inauguratuko du
Ezkurdi parkeko erakusketa-aretoak arte-programazio zabala hartuko du 2025ean zehar, bertako eta eskualdeko talentua herritarren eskura jarriz. Denboraldi berria espazioaren azpiegiturak hobetzeko egin diren lanen ostean iritsi da, jarduera kulturalak garatzeko baldintza egokiak bermatuz.
Erakusketa-egutegi anitza
Durangoko Udalak urte osoko programazioa diseinatu du, 17 ekitaldiz osatua, eta diziplina ezberdinetako artista eta kolektiboen erakusketak barne hartuko ditu. Denboraldia otsailaren 28an, ostiralean, hasiko da Durangaldeko Artisten Elkartearen erakusketarekin. Bertan, 12 gizon eta 9 emakume artisten 47 lan izango dira ikusgai. Ondoren, pintura, argazkigintza eta arte-lehiaketak barne hartzen dituzten hainbat proposamenekin jarraituko du.
Erakusketen artean, honako artisten lanak nabarmenduko dira: Naiara Morales, Martín de Diego Sadabal, Rosa Mª Sánchez eta Rai Bikandi, baita Eibarko Artisten Elkartea bezalako elkarteen erakusketak ere.
Era berean, urrian Ezkurdi aretoak Durangoko Margolaritza Lehiaketaren XXV. edizioa hartuko du, eta azaroan Durangaldeko Gazteentzako IX. Arte Lehiaketa, sormena eta komunitatearen parte-hartzea sustatuz.
Ezkurdi aretoaren berrikuntzak espazio kulturala eskuragarriago egiteko
Erakusketak eta arte-eskolak hartzeko ingurune egokiagoa eskaintzeko helburuarekin, Durangoko Udalak hobekuntza ugari egin ditu Ezkurdi parkeko erakusketa-aretoan. Lan horiek, 12.695,70 euroko (+ BEZa) inbertsioarekin, argiztapena optimizatzeko, azpiegitura modernizatzeko eta espazioaren akustika hobetzeko balio izan dute.
Egindako berrikuntzen artean hauek nabarmentzen dira: LED argiztapen-sistema berria instalatzea, argiztapen-larrialdien sistema ezartzea eta argiztapen-kontroleko sistema hobetzea. Gainera, sabaiak margotu eta bozgorailu berriak instalatu dira, espazioa erakusketarientzat eta bisitarientzat erosoagoa izan dadin.
Hobekuntza hauekin, Durangoko Udalak bertako kulturarekiko eta udal-espazioen egokitzapenarekiko duen konpromisoa berretsi du, Ezkurdi aretoak herriko bizitza artistiko eta kulturalaren erreferente izaten jarrai dezan.