Alzagak Batzar Nagusietan aurkeztu du Las Carrerasko saihesbidearen proposamen berria

Carlos Alzaga Azpiegitura eta Lurralde Garapeneko foru diputatua Batzar Nagusien batzordean agertu da gaur, berak hala eskatuta, Las Carrerasen saihesbide bat eraikitzeko proiektuan, aldez aurretik egindako lanak eta aukeratutako proposamena azaltzeko. Hautatu den aukera, Alzagak azaldu duen bezala, hasierako bost proposamen aztertutakoan, eta 2023ko martxoko proiektuari auzokideen eta sektoreen (administrazioak) alegazio batzuk gehitu ondoren lortu da. Horien ondorioz, 10 proposamen egin ziren.

BI-734 errepideak Abanto-Zierbenan trafikoa arintzeko dituen hamar aukerak aztertu ondoren, proiektu bat idatzi da. Proiektu horren bidez, prozesu berri bati ekingo zaio, zeinean jendaurrean jarriko baita, auzotarren alegazioez gain, kontsulta sektorialak eta eskaerak jasotzeko, besteak beste, ingurumen-inpaktuari buruzko nahitaezko txostena.

Carlos Alzagak azaldutako proposamena etxebizitzetan eta ingurunean eragin txikiena duen aukera da, kostu ekonomiko handiagoa izan arren, foru diputatuak esan duenez; horrez gain, 31 milioi euroko inbertsioa izango dela adierazi du.

Era berean, herritarren eta Abanto-Zierbenako Udalaren eskaerei erantzungo zaie; izan ere, azpiegitura berriak Las Carrerasko trafikoaren ia % 90 aterako du hirigunetik, hau da, egunean 10.000 ibilgailu baino gehiago.

Hautatu den proiektuak 1,2 kilometroko ibilbidea egitea proposatzen du; horretarako, futbol-zelaiaren eta ur-araztegiaren arteko 330 metroko tunel faltsu bat egingo da lurrazaleko ibilbide bati elkartuta, biribilgune banatan hasi eta amaitzen dena. 68 metroko zubi bat ere eraikiko da La Barcenan. Halaber, saihesbidearen hegoaldeko ertzean 2,5 eta 5 metroko pantaila akustikoak jarriko dira, La Trinidad auzoaren ondoko etxeetan zarata handituko ez dela bermatzeko.

Tuneleko obrak amaitu eta ingurua egokitu ondoren, Mortueroko biribilgunea jatorrizkoaren antzekoa izango da, eta jolas-eremuak handitzeko, bi parke jarriko dira, bat haurrentzat eta, bestea, adinekoentzat.

Bizkaiko Foru Aldundiak, Azpiegitura eta Lurralde Garapen Sailaren bidez, Las Carrerasko biztanle-saihesbide bat proposatu du, bai eta Baoko biribilgunearen eta hirigunearen hasieraren arteko bihurguneen trazadura hobetzea ere.

Europako zuzentarauek Istripuen Kontzentraziorako Eremu (UKI) gisa sailkatutako tartea izan da aspalditik. Izan ere, 2014 eta 2023 artean, azterlanak ikertutako tartean 64 istripu erregistratu ziren, guztira; horren ondorioz, 40 biktima izan ziren, horietatik bost, larriak. Istripu motei dagokienez, hauek nabarmentzen dira: atzetik talka egitea, aurrez aurre nahiz alboetan talka egitea eta lau aldiz pertsonak harrapatzea. Pandemian trafikoa aldi baterako murriztu zen arren, orain ezbehar-tasa 2015eko zifretara itzuli da, eta horrek adierazten du egiturazko arriskuek bertan jarraitzen dutela. Beraz, bide-segurtasunari buruzko nazioarteko aginduei eusteko, arazo horrek azpiegituren kudeaketa proaktiboa eskatzen du, istripu-tasa murriztuko duena.