Lurraldeko industrialdeak modernizatzeko eta hobetzeko 850.000 euro bideratuko ditu Bizkaiak

Aurten, Bizkaiko Foru Aldundiko Ekonomia Sustatzeko Sailaren Industrialdeen Programak 853.349 euro eman ditu laguntzetan, guztira, 2023an emandakoak baino % 47 gehiago. Ekitaldi hartan, tokiko eta eskualdeko garapen-agentzien lankidetzari esker, bultzada handia eman zen lurraldeko gobernuak bultzatzen duen Bizkaiko lurralde-orekaren aldeko Orekan Sakonduz estrategiaren esparruan. 2022. urtearekin alderatuta, igoera % 82koa izan zen, eta eman diren laguntzen zenbatekoa 581.422,39 eurokoa da.

Laguntza-programa honek eskualdeko lehiakortasunaren eta garapenaren faktore giltzarrietako bat azpimarratzen du: jarduera ekonomikorako guneak izatea, kasu honetan industrialde modernoak, lehiakorrak eta erakargarriak industria-jarduera garatzeko, eta enpresa berriak erakartzea Bizkaiko udalerri eta eskualdeetara. Horixe da lan-ardatzetako bat lehiakortasuna bizkortzeko eta udalerriak eta eskualdeak garatzeko etapa berrian, Bizkaiko Orekan Sakonduz programaren esparruan legegintzaldi honetarako iragarri dena.

Bizkaiko Foru Aldundiko Ekonomia Sustatzeko Sailak Bizkaia Orekan Sakonduz sareko toki- eta eskualde-garapeneko agentziek garatutako dinamizazio-lanari laguntza ematen dio, eta horrek garrantzi handia du enpresak eta udalak hobekuntza-planak eta inbertsioak garatzera animatzen baititu, modernizatzen laguntzeko, eta beren udalerri eta eskualdeetako industrialdeak lehiakorragoak, iraunkorragoak eta erakargarriagoak izan daitezen.

Bizkaiko eskualdeetan gero eta gehiago dira inbertsioak egiten ari diren industrialdeak, baina nabarmentzekoa da 2024an inbertsio zehatzetarako emandako dirulaguntzen % 54 Meatzaldea eskualdeko industrialdeetara joan dela, eta, ondoren, Arratiak hartzen du emandako laguntzen % 16, Galdakaoko Erletxe industrialdera bideratuta. Nerbioi Ibaizabalek, berriz, emandako zenbateko osoaren % 12 jasotzen du, eta poligono bakarrera bideratuko du; Enkarterrik, ordea, bi poligono hobetuko ditu, laguntzen % 11 banatuta. Gainerako dirulaguntza Lea Artibaiko poligono batean ( % 6) eta Busturialdeko beste batean ( % 2) eman da.

2024an, Barakaldoko poligono bat, Ezkerraldean, eta Nerbioi Ibaizabal eskualdeko bi poligono, bata Basaurikoa eta bestea Etxebarrikoa, Bizkaiko Foru Aldundiaren laguntza jasotzen duten udalerrien eta eskualdeen zerrendara sartu dira, dagokion industrialdeko enpresa-elkarteak, jabeen erkidegoak, entitateak edo kontserbazio-batzordeak hobekuntza-planak egin ditzan epe labur eta ertainean beren jarduera garatzen duten espazioetarako. Plan horiek egiteko 32.562 euroko laguntzak esleitu dira. Nabarmentzekoa da lan-ildo horretan eskualde berriak sartu direla, eta, beraz, banaketa handiagoa dagoela lurralde osoan, eta eragina duela eskualde-garapeneko estrategiaren bidez lortu nahi den lurralde-orekan.

Inbertsioak askotarikoak izan dira: elementu oinarrizkoenak hobetu dira, hala nola seinaleak berritu dira edo bideozaintzako kamerak jarri dira industrialdean; energia-eraginkortasuna hobetu da, eta eragin positiboa izan du industrialdearen eta udalerriaren iraunkortasunean, enpresen emaitzen kontuan plaka fotovoltaikoak jarri dira, eta mugikortasuna eta industrialderako sarbidea hobetzeko inbertsioak egin dira.