Sestaoko Labe Garaian sortutako espazioak 'Labe Garaia parkea' izena jasoko du

Sestaoko Udalak herriko Labe Garaian sortutako hiri espazio berriak 'Labe Garaia parkea' izena jasoko du. Udalak, asteartean egindako bilkuran, talde politiko guztien sostengua jaso zuen. Oraingoz, esparrual 10.000 metro karratuko azalera du, baina etorkizunean 5.000 metro gehiago zabaltzea espero da, Labe Garaiaren eta Ikastunen Eskolaren artean dagoen orubea urbanizatu eta gero.

Labe Garaia parkea Labe Garaiaren monumentuaren eta ondoan eraiki den bisitarientzako eraikin berrirako sarrerako atea izango da. Espazio publiko berri horrek bi sarbide izango ditu; lehenengoa Iberia kalearen behealdean egongo da, eta bigarrena, berriz, igogailu bat eta eskailera batzuk, La Benedictara sartzeko biaduktuan eraiki direnak.

Antzina, orain parke bihurtutako lursail horiek ArcelorMittal enpresaren parte izan ziren. Hala ere, 2018an birpartzelazio-proiektu bat onartu zen, altzairugintzaren mugak zehaztasun handiagoz definitu zituena. Hirigintza-tresna horri esker, espazio hori libre utzi ahal izan zen Sestaoko herritar guztien gozamenerako. Horrela, iraganean jarduera siderurgikoa izan zuten lurrak deskontaminatu ondoren, Udalak lurzorua urbanizatu du erabilera berri bat emateko, eta horretarako Eusko Jaurlaritzaren eta Bizkaiko Foru Aldundiaren laguntza ekonomikoa izan du. Sestaoko Udalak irailean espazio publiko berri hau jendearentzat irekitzea espero du.

Kreditu-aldaketak

Bestalde, EAJ-PNVk eta PSE-EEk osatutako Gobernu Taldeak lau aurrekontu-aldaketa aurkeztu ditu osoko bilkuran, hainbat kontu-sail ekonomikorekin, udal-arloen beharrei erantzuteko. Hona hemen aurrekontu-aldaketa horietan jasotzen diren partida ekonomiko nabarmenetako batzuk:

- Udal aurrekontuan 2 milioi euroko partida bat sartu da, Next Generation Europako Funtsetatik datorrena, Las Llanaseko Udal Pilotalekua birgaitzeko hirugarren faseari ekiteko. Hirugarren fase honetan, Udalak energia-eraginkortasuna hobetzeari ekingo dio, inguratzaile osoan jardunez eta plaka fotovoltaikoak instalatuz.

- 200.000 euroko beste partida ekonomiko bat sartu da aurrekontuan, Antonio Trueba kaleko lehen arrapala mekanikoa ordezteko. Arrapala hori zerbitzutik kanpo dago, sute batek instalazioan kalte handiak eragin zituelako. Jasandako kalteen ondorioz, arrapala osoa ordezkatu beharko da.

- Gizarte-arloan, 170.000 euro gehiago sartu dira Etxeko Laguntza Zerbitzurako, itxaron-zerrendan dauden pertsonei estaldura emateko eta hitzarmen kolektibo berriak ezartzen duen soldata-igoerari aurre egiteko.

- Bestalde, 165.000 euro gehiago jarri dira Gizarte Larrialdietarako Laguntzetarako, urteko azken hilabeteetan iristen diren eskaerei erantzuteko.

- Lantzen den beste gai bat da Udalak AFISES eta AUNAR elkarteekin dituen lankidetza-hitzarmenen hobekuntza ekonomikoa, dibertsitate funtzionala duten pertsonen bizi-kalitatea hobetzeko eta familia kalteberei janari prestatua eta izoztua emateko.