Beste behin ere, Amorebieta-Etxanoko kaleak musikaz eta jai giroaz beteko dira Haizetara Kaleko Nazioarteko Musika Lehiaketaren XVII edizioaren eskutik. Izan ere, ekainaren 21, 22 eta 23an herriko kaleak agertoki bihurtuko dira eta hainbat herrialde eta musika estilotako bederatzi bandek jaialdi aberatsa bezain anitza eskeiniko dutela aurreikusten da. “Urteak dira jada Haizetara jaialdia ospatzen dugunetik eta hitzordu garrantzitsua bilakatu da dagoeneko gure herrian. Urteak joan eta urtean etorri, gainera, ospe eta errekonozimenduko jaialdi bilakatu da eta kulturak eta arteak, sarritan, erronka zailei aurre egin behar dieten garai honetan, ezinbestekoa da horrelako jaialdi baten balioa eta garrantzia aintzat hartu eta gogoraraztea. Haizetara ez da musika jaialdi bat bakarrik; kultura eta estilo ezberdinen topagunea da, beste urte batez, gure kaleak musikaz eta giro onez beteko dituena. Goza dezagun, beraz, kalitateko musika emanaldiez, kalitateko musikari eta taldeen eskutik”, adierazi zuen Ainhoa Salterainek Amorebieta-Etxanoko alkateak.
17 urte pasatu dira Haizeta jaialdiaren lehen edizioa ospatu zenetik eta aurtengo lehiaketan, hiru egunez, izena eman duten 51 taldeen artean hautatutako bederatzi talde arituko dira herriko hainbat tokitan, publiko guztiarentzako emanaldiak eskainiz eta lehiaketako hiru sariak eskuratzeko lehiatuz.
Ildo horretan, aukeratutako taldeek "esperientzia aberatsa eta askotarikoa eskainiko dute, beren musika estilo desberdinei esker", eta hautatutako bandak: Tenampa Brass Band mexikarrak, Orchestre National du Jahiner (Frantzia), Brazzmatazz (Belgika), UGS Brass Band (Frantzia), Llareggub Brass Band (Erresuma Batua), Pixie & Dixie Band (Espainia), Trocamba Matanusca (Espainia), Tamarros (Italia) eta New Tocados txaranga madrildarra dira.
Haizetara hasi aurretik, atzo, hilak 19, hainbat ekitaldi egin ziren Zelaieta Zentroan, Musikaren Europako Egunaren harira. Ekitaldi horien artean kokatzen dira, besteak beste, "Emakumeak musikaren industrian" mahai-ingurua eta hainbat musika emanaldi.
Jaialdira bueltatuz, ekainaren 21ean hasiko da, 19.00etan, Zelaieta parkean, taldeen aurkezpenarekin. Hiru egunez, talde bakoitzak lau kontzertu eskainiko ditu herriko hainbat tokitan. Lehen eguneko ordutegiari dagokionez, aurkezpena eta gero New Tocados bandak bere lehen emanaldia eskainiko du Zelaieta parkean (19.30) eta jarraian, 20.30ean Pixie & Dixie Band izango da Andra Mari plazan. 21.00etan Trocamba Matanusca taldea ikusteko aukera izango da Ogenbarrenean eta musika ez da geldituko datozen orduetan eta egunetan. Egun bakoitzeko programa eta ordutegia www.haizetara.eus webgunean kontsulta daitezke.
Lehiaketako taldeak
LLAREGGUB BRASS BAND
Erresuma Batua
Galesko musika banda bat da, 9 kidez osatua eta 2015ean sortua. Galesko musika tradizionala hip hoparekin, funkarekin eta New Orleanseko jazzarekin nahasten du. Gales iparraldeko arbel meatzarien musika banden antzinako tradizioa dela eta, LlareggubBrass Band iraganeko errautsetatik azaleratzen da eta metal astunen dosi izugarria dakar berarekin. Bere musikak New Orleanseko musika bandak aldarrikatzen ditu, Bronxen inspiratutako hip hopa eta galesen pop musika barne. Bere lehenengo emanaldia 21ean izango da 22.00etan Arraibi plazan.
LA TROCAMBA MATANUSCA
Espainia
12 kideko banda instrumentala da, zuzeneko dibertigarria du, energiaz betea eta oso dantzagarria. 2009an sortu zirenetik, kalidoskopio ozen bat osatuz joan dira, non fanfarre balkanikoak, folka, swing edo jazz zertzelada batzuk eta clezmer eta ska estiloen leherkortasuna elkartzen diren. Hiru album argitaratu dituzte, dantzara eta parte hartzera gonbidatzen duen zuzeneko dinamiko bat dutenak. 360 emanaldi baino gehiago eskaini dituzte agertoki eta emanaldi ibiltarietan, eta nazioarteko folk musika eta fusio jaialdietan parte hartu dute.
THE HUGS
Frantzia
2022an jaiotako brass band honek jazz eta punk musika, musika fresko berria eta konposizio originalak nahasten ditu. Saxofoi-tenore, tronpeta, tronboi, tuba eta bateria independente batez osatutako 6 instrumentistarekin, Brass Band honek groove mundura eramango zaitu jatorrizko musika euforikoari eta bere kalitateari esker. Taldearen ehenengo emanaldia 21ean izango da 21.00etan Kalbario plazan abiatuta. eta 21.30ean Harrison plazan jarraituko dute. Bigarrena 22an izango da 19.00etan Gernika plazan. 23an, berriz, Sabino Arana kalean 12.00etan.
BRAZZMATAZZ
Belgika
14 laguneko musika banda da, New Orleans eta Balkanetako musikaren eragina duena, soinu elektroniko eta modernoekin konbinatuz. Dekorazioa, jantziak eta ikusleak konbentzituko dituen steampunk ikuskizuna, kalean zein agertoki handietan. Ganteko Jaialdiko Kaleko Artista Onenaren Saria irabazi zuten eta PoléPolé, Dranouter, Vooruit, Casino, Bozar, DeSingel... bezalako jaialdi eta aretoetan aritu dira. Bere lehenengo emanaldia 21ean izango da 23.00etan Zelaieta parkean. Hurrengo egunean Ogenbarrenan egongo dira 20.00etan.
PIXIE & DIXIE BAND
Espainia
Peñafiel (Valladolid) eta Palentziako musikariek osatzen dute taldea, eta 1993an hasi zen lanean. New Orleanseko jatorrizko jazzaren berezko formazio erabat akustikoarekin, bere musikari izaera kaskarra ematea lortu zuen, eta horri esker, hainbat emanaldi ematen hasi zen, kaleko animazioa indargune gisa nabarmenduz. New Orleans, Chicago eta New Yorkeko taldeek soinuak eta giro musikala eskainiko dute. Bere lehenengo emanaldia 21ean izango da gaueko 20.30ean Andra Mari plazan. Hurrengo egunean Kalbario plazan izango dira 21.30ean.
ORCHESTRE NATIONAL DU JAHINER
Frantzia
Frantziako 5 kideko talde honek originaltasun musikala eta bihurrikeria eszenikoak uztartzen ditu. Instrumentu tradizionalen erabileragatik nabarmentzen dira, konposizio originaletan erabiltzen baitituzte. Haizetara jaialdian hiru emanaldi eskainiko dituzte. Lehenengo emanaldia 21ean izango da 21.30ean Gernika plazan. Bigarrena 22an izango da 13.00etan Luis Urrengoetxean eta igandean, hilak 23, azkenengo ikuskizuna emango dute goizeko 11.30ean hasika. Kasu honetan Arraibi plazan egongo dira kaleak alaitzen.
TENAMPA BRASS BAND
Mexiko
Tenampa Brass Band Mexikoko musika banda bat da. Hainbat ekitaldi eta jaialditan parte hartu duten 7 musikarik osatzen dute. Tenampa Brass Band ezaguna da bere energia kutsakorragatik, errepertorio anitzagatik eta entzuleekin elkarreragiteko duen gaitasunagatik, festa giro paregabea sortzen baitute. Tronpetek, tronboiek, saxofoiek, tubak eta perkusioak erritmoz beteriko ikuskizuna ematen dute. Bere lehenengo emanaldia 21ean izango da 24.00etan Zubiondo plazan. 22an, berriz, Andra Mari plazan egongo dira 20.30ean.
THE TAMARROS
Italia
Disko musika banda bat da. Ileorde afroak, ispiluzko eguzkitako betaurrekoak, kanpai koloreko galtzak eta distira eta lentejuelak erabiltzen dituzte. Kaleak Sobreviviré, Sex Bomb, My Sharona eta beste erritmo arrakastatsu askorekin animatzen dituzte. Musikariek, 12 kasu honetan, akustikoan jotzen dute, tronpeta, tronboi, eufonia, saxo baritono, gitarra eta perkusioekin musika banda bat osatuz. Bere lehenengo emanaldia 21ean izango da gaueko 21.45ean Euskal Herria plazan. 22an 19.30ean hasiko dute zuzenekoa San Juan kalean.
NEW TOCADOS
Espainia
Kaleko animazioko musika-proiektu bat da, kalean egiten diren musika-ikuskizunak ulertzeko modu berritzaile bat eskaintzen duena. Hala ere, txaranga bat baino gehiago da. 9 musikariz osatutako talde madrildar honek ezin hobeto uztartzen ditu umorea eta publikoarekiko interakzioa. Errepertorio musikal anitza eta ondo landua dute, indartsua eta dinamikoa; rocka, musika elektronikoa edo erritmo latinoak bezalako estilo anitzak uztartzen ditu, Brass Band amerikarren sonoritatearekin eta formatuarekin.
