Sestaoko Udalak labezomorroen populazioa kontrolatzeko txoke-plan bat abiarazi du

Sestaoko Udaleko Zerbitzu zinegotzi Rosa María del Palaciok asteazken honetan goizean ezagutzera eman duen bezala, bide publikoan labezomorroen aleak agertu ondoren, intsektu horren populazioa kontrolatzeko txoke-plan bat jarriko du martxan Udalak. Udalerrian intsektuak hiltzeko lanak egiten dituen enpresarekin elkarlanean ari dira jarduera hori egiten.

"Intsektu honen jarduera eta aleen ugalketa handiena den urteko une batean gaude, bere ohiko aterpeetatik irtenda eta herritarren begietara ikusgarriago bihurtuz", azaldu du Rosa María del Palaciok, eta arazo hau "ingurumen-faktoreek larriagotu egiten dute, hala nola hezetasunak eta izaten ari garen tenperaturek".

Sestaoren kasuan, auzotarren komunitateak eta pertsona partikularrak jarri izan dira Udalarekin harremanetan, labezomorroak espazio publikoetan ez ezik, atarien eta etxebizitza partikularren barruan ere badaudela jakinarazteko, batez ere gaueko ordutegian.

Eremu horretan labezomorro beltza da labezomorro ohikoena, eta haren itxura eta/edo kolorazioa bat baino gehiago izan daitezke garapen-fasearen arabera. Txoke-plan hori ezartzeko, Zerbitzuen arloak azken asteetan jasotako instantzia eta abisu guztiak bildu ditu, eta informazio hori enpresari helarazi dio. Jarraian, enpresak txoke-plan bat eta jardun behar duen eremuen mapa bat diseinatu ditu, ia udalerri osoa hartzen duena, eta estolderian, espaloietako zintarrietan eta intsektu horien presentzia hauteman ohi den beste puntu batzuetan esku hartzea aurreikusten duena.

Labezomorroen populazioa kontrolatzeko produktu berezien aplikazioa San Pedro plazatik eta Markonzaga auzotik eta Karmengo Ama auzunetik hasi da, eta ondoren Albiz auzoak, Txabarrik, La Anunciación eta La Paz auzuneetatik eta ekintza-planean jasotako gainerako eremuetatik jarraituko dute mapan markatutako puntu guztiak bete arte.

Ernesto Cañónek, prentsaurrekoan egon den intsektuak hiltzeko enpresako arduradunak, txoke-plan hori gauzatzeko behar den denbora bi eta hiru aste artekoa izango dela kalkulatu du.

​Cañonek azaldu duenez, labezomorroen presentzia handiak eragindako arazo hori errepikatzen ari da inguruko beste udalerri batzuetan, "negua ez delako oso txarra izan, eta labezomorroen populazioak ohi baino altuagoak izan direlako; hori dela eta, udaberria iristean, tenperatura leunagoak eta prezipitazioak ugaritu egin dira, eta horregatik gehiago ikusten dira".