Elorrio eta Abadiñoko Udalek beren gizarte-arloak indartu dituzte, Mankomunitatearen laguntzarekin, gizarte langile bat kontratatuz. Pertsona honek Elorrion astelehenetan jardungo du, Abadiñon asteazkenetan eta gainontzeko egunetan Galtzaretan (Durango), otsaila eta uztaila bitartean.
Gizarte langileak lanaldi osoa izango du, bai Elorrion eta bai Abadiñon ahalik eta presentzia handiena izateko ordutegi propioarekin. Astelehenetan Elorrioko udaletxean arituko da lanean, eta asteazkenetan, berriz, Abadiñon, Zelaietako bulegoa berreskuratuz. Asteko beste egun batzuetan Galtzaretara joango da, zereginen pilaketarekin zerikusia duten barne lanak egitera.
Mankomunitateko lehendakari eta lehendakariorde Idoia Otaduyk eta Ainara Otxotorenak balioetsi dute gizarte langileen lantaldean errefortzu hori ezartzeak “erakusten duela Mankomunitateak eta Abadiñoko eta Elorrioko udalek beren gizarte arloa hobetzeko duten konpromisoa, arreta pertsona bakoitzaren eskaeretara modu eraginkorrean egokituz”.
Hitzordua hartu nahi dutenek 94 620 04 92 telefono zenbakira dei dezakete ezarritako ordutegian. Landa eremuetan bizi direnei gomendatzen zaie euren kokapena adieraz dezatela hitzordua eskatzean, koordinazioa errazteko.
Elorriarrei kontsultaren gai espezifikoari buruz galdetuko zaie herritarren arreta optimizatzeko. Horri esker, gizarte langile egokiena bilatuko da norbere beharrei aurre egiteko eta gehien egokituko zaion zerbitzua eskaintzeko.
Julene Lazkanok, Elorrioko alkate eta gizarte arloko arduradunak, Mankomunitatearen eta eskualdeko udalen arteko elkarlanaren garrantzia azpimarratu du, herritarrentzat hain garrantzitsua den zerbitzu honen kalitatea hobetzeko.
