Abanto Zierbenako Enplegu arloak 17 enpresa eta negozio berri sortzen lagundu zuen iaz

121 herritarren kontratazioa sustatu eta udalerrian 17 negozio berri sortzen lagundu zuen iaz Abanto Zierbenako Enplegu eta Garapen Ekonomiko sailak, Tokiko Garapen Agentziaren bidez.

“Dudarik gabe, udalerriko ekintzaileei laguntza ematea da gure lehentasunetako bat. Badakigu pausoa eman eta enpresa berria hasteak ahalegin pertsonal eta profesional handia eskatzen duela, are gehiago egungo egoera ekonomikoan. TGAk lan hori aitortzen eta laguntza ematen jarraituko du, nahi dutenek beraien bizi- eta lan proiektua hasteko aukera izan dezaten” adierazi du Abanto Zierbenako Enplegu eta Garapen Ekonomikoko zinegotzi Maitana Martínez Goirik.

Enpleguari dagokionez, aurreko urtean zehar 46 pertsona kontratatu ziren udalerriko enplegu programetan, langabezian dauden udalerriko 6 pertsonentzako lan-kontratu mugagabe lagundu ziren diruz, eta 69 herritarrentzat onuragarriak izan ziren 61 lan-eskaintza kudeatu ziren. Horretaz gain, 2022an lan aholkularitzako 5 programa abiatu ziren, eta horiei esker 87 pertsonek lana bilatzeari edo enplegua hobetzeari buruzko informazioa eta banakako aholkularitza pertsonalizatua jaso zuten.

Abanto Zierbenan langabezian dauden pertsonen kopurua behera egiten ari da pixkanaka, eta urtea langabezian dauden 59 pertsona gutxiagorekin amaitu dugu, eta % 11.6ko tasarekin. Hala ere, Abanto Zierbenako langabezia-tasa ez da nahi duguna, eta, hori dela eta, lanean jarraituko dugu. Abanto Zierbenako Udaleko Enplegu eta Garapen Ekonomikoko arloarentzat lehentasunezkoa da langabezian dauden pertsonei lan-munduan txertatzen laguntzea, eta baita lan egoera hobetu nahi duten eta kalitate handiagoko enpleguaren bila dauden pertsonei laguntzea ere.

Pertsona horien guztien enplegagarritasuna hobetzeko Enplegu eta Tokiko Garapen Agentziaren bidez ematen ditugun zerbitzuak indartu ditugu, aholkularitza, trebakuntza eta lan bitartekotza zerbitzuak emanda, hurbileko arreta pertsonalizatuaren bidez.

Ekintzaileak laguntzeko kapituluan, 2022an ekintzailetzari buruzko 45 kontsulta egin ziren, eta autoenpleguko 22 proiekturen tutoretza egin zen. Horietako 17k alta eman zuten enpresa berri gisa. Gainera, 15 enpresa-ekimenek Prebentorion dagoen enpresa mintegian gauzatzen dute jarduera, eta, berrikuntza gisa, iaz Enpresa Sortu Berrientzako I. Laguntza Programa hasi zen.

Ezinbestekotzat jotzen dugu udalerrian enplegua eta aberastasuna sortzen duten enpresa-proiektu berriak abiarazi nahi dituzten ekintzaileei laguntzea aholkularitza, laguntza tekniko eta proiektuaren banakako jarraipenaren bidez.

Beste kapitulu garrantzitsua trebakuntzarena da. Horren baitan trebakuntzarako 2.270 ordu eman ziren, lanerako prestakuntzako 8 ikastarotan eta trebakuntza eta enpleguko programetan integratutako 2 ikastarotan banatua. Guztira, 146 langabek jaso dute prestakuntza.

2022an zehar 107 pertsonek eman zuten alta Tokiko Garapen Agentziaren datu-basean.

Enplegu eta Tokiko Garapen Agentziaren zerbitzuei buruzko informazioa biltzen duen gida berri bat argitaratu da. Herritarren interesa piztea espero dugu, eta gu bisitatzera eta zerbitzu horiek erabiltzera gonbidatzen ditugu.