Durangok herriko kaleak asfaltatuko ditu abuztuaren amaieran

Hilaren amaieran hainbat asfaltatze lanak hasiko dira Durangon, seinale horizontalak ezartzeaz gain. Lanak abuztuaren amaieran hastea espero da eta guztira Udalak 209.787 euro (BEZa barne) inbertituko ditu, Asfaltia S.L enpresaren eskuz.

Hainbat urtez ez da inolako kanpainarik egin Durangoko udalerrian trafikoari irekitako kaleen egoera hobetzeko; horregatik, 2022ko aurrekontuetan partida bat aurreikusi da ekitaldi honetan kontzeptu horrengatik egin nahi diren konponketei aurre egiteko.

Asfaltatze kanpaina honetan berritu beharreko kaleak Zumalakarregi-Montevideo, Faustebidea, Zabalarrako biribilgunea, Larrasoloeta-Antso Estegizko bidegurutzea, Askatasun Etorbidea eta Aramotz arteko zatia, Agirre Lehendakaria eta Tabirabide izango dira. Bestalde, Larrasoloeta eta Herriko Gudarien kaleetako hiru irtenguneen maila murriztuko da.

“Proiektu berriak gauzatzeaz gain, erakunde publikoek gure udalerrien mantentze orokorra zaindu behar dugu, eta errepideen egoera oso garrantzitsua da. Horregatik, 200.000 euro baino gehiago inbertitu ditugu denbora luzea zeramaten errepide horiek konpontzeko”, Ima Garrastatxu alkateak eta Julian Rios alkateordeak azaldu dutenez.

Jarduera horien bidez, erabiltzaileen erosotasuna eta segurtasuna hobetu nahi dira. Era berean, udal bide ondarea zaindu nahi da, are gehiago hondatu ez daitezen eta, kasu batzuetan, zoladura erabat berritu behar ez dadin.

Lanak egiteko ordena Udalaren Bulego Teknikoak eta Udaltzaingoak ezarriko dute, trafiko mozketek durangarren egunerokotasunari ahalik eta gutxien eragiteko. Lanen iraupena meteorologiaren araberakoa izango bada ere, lanen gehieneko iraupena bost hilabetekoa izan daiteke.