Eskualde-lehiakortasuna bultzatzeko programa indartuko du Bizkaiak

Programa tokiko eta eskualdeko garapen-agentziei zuzenduta dago, enpresa-lehiakortasuna eta lurralde-oreka hobetzeko proiektuen eta ekimenen bultzatzaile gisa jardun dezaten Bizkaia Orekan Sakonduz eskualde-garapenerako estrategiaren ildotik. Dirulaguntzaren gehieneko zenbatekoa 100.000 eurokoa da erakunde onuradun bakoitzeko, eta 200.000 eurora iritsi ahal izango da euren lurralde-eremuko enpresentzat erreferentzia bakarra diren erakundeen kasuan.

Programak industria-sektoreetako, industriarekin lotutako zerbitzuetako, garraioko eta handizkako merkataritzako enpresen beharrei erantzuteko jarduketak jasotzen ditu. Era berean berrikuntza, nazioartekotzea eta ekintzailetza aurreratua bultzatuz ekonomia suspertzea eta lehiakortasuna hobetzea helburu dutenak ere sartzen dira. Programa honen bidez Bizkaiko Foru Aldundiko Ekonomia Sustatzeko Sailak diruz laguntzen ditu tokiko eta eskualdeko erakundeek beren jarduketa-eremuetan enpresen lehiakortasuna sustatzen duten eragile gisa garatu beharreko zeregina indartzeko ekimenak, besteak beste gobernantza-eredu berrien diseinua eta abiaraztea finantzatuz eta eskualdeko plan estrategikoak formulatuz.

Bizkaia Orekan Sakonduz Lurralde mailan oreka horretan sakontzea lortzeko estrategia Lurralde Lehiakortasuna eta Turismoa Bultzatzeko Zuzendaritzaren jarduketa-ardatzetako bat da; horretarako lurraldeko beste erakunde batzuen eta aliatu estrategikoen eskutik, hala nola klusterren eskutik, maila askotako gobernantza kolaboratiboa eta udalekin eta tokiko eta eskualdeko garapen-agentziekin egiten duen lana sustatzen du.

Bizkaia Orekan lehiakortasunaren arloan Bizkaiko eskualdeek dituzten ahultasunak eta aukerak diagnostikatzeko eta ezagutzeko foro gisa sortu zen eta azken bi urteetan bilakaera izan du lankidetza-eredu berritzaile bihurtu arte, lurraldeko eskualde eta eremu guztietan lurralde- eta enpresa-lehiakortasun jasangarriarekin zerikusia duten agenteak biltzen dituen sareen sarea.