Miguel Etchegoncelayk hartuko du batuta ostiralean

Datorren ostiralean, martxoaren 20an, Miguel Etchegoncelayk Bilboko Udal Musika Bandaren batuta hartuko du, J. C. de Arriaga Kontserbatorioan 'Egunsentiari begira' egingo den kontzertuan.

Kontzertuak estilo eta garai desberdinetako lanak bilduko ditu. Lehenengo pieza Lindsay Bronnenkant konpositore estatubatuarraren “Tarot” suitea izango da, tarot-kartetan agertzen diren irudi sinbolikoetan oinarritua. Ondoren, Maurice Ravelen 'Alborada del gracioso' entzungo da, Christiaan Janssenek bandarako egindako moldaketan. Kolorez eta birtuosismoz beteriko obra da, eta Espainiako antzerkiaren iruditeriatik edaten du.

Egitaraua

Egitarauak aurrera egingo du 'Variaciones sobre Buenos Aires' lanarekin. Pieza hau Miguel Etchegoncelayk berak moldatutakoa da, Astor Piazzollaren “Tangazo” entzutetsuan oinarrituta. Obra honek tango garaikidearen indarra eta erritmoa banda sinfonikoaren soinuetara ekartzen ditu. Kontzertua Alexandre Kosmickiren “Contemplation” lanarekin amaituko da. Kolore eta sonoritate askotako obra da, une lasai eta lirikoak pasarte biziagoekin tartekatzen dituena, amaiera distiratsu batekin.

Esan bezala, kontzertua Europan bizi den Miguel Etchegoncelay argentinar zuzendariak gidatuko du, bere lan artistiko eta pedagogikoagatik nazioartean ezaguna den maisua. Argentinan eta Europako zentro ospetsuetan (Zuricheko eta Basileako kontserbatorioetan, esaterako) hezia, Europan, Amerikan eta Estatu Batuetan zuzendari gonbidatu gisa ibilbide luzea egin du, erreferentziazko banda eta talde sinfoniko ugarirekin elkarlanean.

Ibilbidea

Jardun artistikoaz gain, irakaskuntzan ere ibilbide garrantzitsua du. Gaur egun Estrasburgoko Kontserbatorioan eta Haute École des Arts du Rhin (HEAR) erakundean irakasten du. 2024az geroztik, gainera, WASBE – Munduko Banda eta Talde Sinfonikoen Elkarteko presidentea da. 2025ean, halaber, Bilbao Musika Orkestra Zuzendaritzari buruzko IX. Topaketen irakasle gonbidatua eta Bilbao Musika Nazioarteko Zuzendaritza Sariaren epaimahaiburua izan zen.

Kontzertua martxoaren 20an izango da, ostirala, 18:30ean, J. C. de Arriaga Kontserbatorioan, eta sarrera doakoa izango da aretoa bete arte.

Denboraldiak martxoaren 27an jarraituko du, Aste Santuko musikaren inguruko kontzertu berezi batekin, 19:00etan, Santos Juanes elizan. Kontzertua Iñaki Urkizu zuzendariak gidatuko du, eta egitarauak garai honetako giroa eta tradizioa ekarriko ditu gogora.