Síguenos en redes sociales:

Bilboko Udalak hiru igogailu eraikiko ditu Zurbaranbarrin

Guztira, 2.543.462,19 euro gorde dira hiru igogailu berri horiek eraikitzeko, eta egikaritzeko epea hamalau hilabetekoa izango da

Deia.eus

Bilbao | 28·09·25 | 06:00 | Actualizado a las 01:22

Bilboko Udalak hiru igogailu eraikiko ditu ZurbaranbarrinB. U.

Bilboko Udalak 2.543.462,19 euroko aurrekontua bideratuko du Zurbarranbarri auzoan hiru udal-igogailu publiko berri eraikitzeko. Lanak datorren astean hasiko dira, irisgarritasun unibertsalarekin duen konpromisoa aldarrikatuz, eta hamalau hilabete iraungo dute.

Horrela, Zurbaranbarrirako diseinatutako hiru elementu mekaniko berri horiek auzo horretako aldapa handiak arintzen lagunduko dute, auzo horretako irisgarritasuna zaila baita, bai haren orografiaren ondorioz, bai bere garaian landutako urbanizazioaren ondorioz.  

Igogailu horiek instalatuko diren eremua desnibel handia duten hainbat kale paralelok osatzen dute. Izan ere, jarduketa-eremuaren gune altuenetik baxuenera arteko kotan 15 metro inguruko aldea dago.

Zehazki, hiru igogailu berrien arteko lehena Zurbaranbarri kaleko 23. zenbakiko blokearen albo batean jarriko da. 5,27 metroko desnibela salbuetsiko du eta 24. eta 25. zenbakietako blokeetako plataformarekin konektatuko da. Orain eskailerak dauden lekuan kokatuko da. Hortaz, eskailerok eraitsi eta berriak egin beharko dira, espazio berrira egokituta.

Bigarren igogailua lehenengotik oso hurbil egongo da, aipatutako 23. zenbakiko blokearen atzean.  Kasu honetan, 4,61 metroko desnibela salbuetsiko du, eta, aldi berean, 26. eta 27. atariei sarbide zuzena emango die.  6,5 metro luzeko pasabide bat eraiki beharko da igogailua eta goiko aldeko urbanizazioa lotzeko.

Azkenik, hirugarren igogailua gaur egun 30E eta 28 blokeak lotzen dituzten eskaileretan kokatuko da; eskailera horiek, era berean, 30D eta 29 atarietarako sarbidea ematen dute.  3,98 metroko desnibela salbuetsiko du.

Hiru igogailu horietako bakoitzak bi geraleku izango ditu.

Mugikortasun bertikala

Bilbon 78 elementu mekaniko daude zerbitzuan, igogailuak, aldapak eta eskailerak kontuan hartuta.

Kopuru hori handitu egingo da laster, gaur egun beste zortzi egikaritzen ari baitira: Zurbaranbarriko hiru horietaz gain, hauek ere eraikitzen ari dira:

  • Masustegi auzorako proiektatutako igogailu inklinatua, 4.492.331,68 eurokoa;
  • San Frantzisko auzoan, Harrobi plazaren eta Kontzezio kalearen artean kokatzen dena, 3.089.962,83 eurokoa.
  • Beste bat Fika eta Iturribide kaleen artean (Santutxu), 972.477,23 eurokoa.
  • Beste bat, Boluetan, San Joaquin auzoan, 1.242.906,72 eurokoa;
  • Eta azkena Lezeagan, Masustegi auzoko beheko aldean, 628.743,65 eurokoa.

Beste bat eraikitzeko lanak ere laster hasiko dira: Bolueta eta Txurdinaga artean, 1.359.889,77 eurokoa.