Pixkanaka-pixkanaka, Bilbo Europa eta mundu osoko dimentsioa hartzen duten ekitaldien egoitza ohikoenetariko batean bihurtzen ari da. Kirolaren arloan, duela egun batzuk UEFA Europa Leagueren finala hartu zuen, eta datorren artean errugbi-finalak jasoko ditu baita ere. Horrez gain, Bilbao BBK Live jaialdiaren egoitza da, kulturaren arloari dagokionez.
Horrez gain, 2026ko ekainaren 10etik 14ra, Bilbo izango da Europako museologia eszenaren erdigune. Euskalduna Jauregian ospatuko dira European Museum of the Year Awards (EMYA) sarien banaketa eta kongresua, European Museum Forum-ek antolatuta.
Bilbok Europako museo-eszenako ekitaldirik prestigiotsuena hartuko du datorren urtean. Hiru eguneko kongresua izango da museoen sektoreko profesionalentzat eta kultur eragileentzat. Ondoren, sari banaketaren gala egingo da, eta hainbat kultura-ekintza osagarri ere antolatuko dira hirian.
Leixuri Arrizabalaga, Euskara, Kultura eta Kirol Saileko foru diputatua, pozik agertu da albistearekin: "Nazioarteko kultur ekitaldi garrantzitsu bat hartuko dugu gure hirian, aukera paregabea da gure museoak ezagutzera emateko, nazioarteko harremanak sendotzeko eta ezagutza trukerako."
EMYA sariak
1977. urtean Europako Kontseiluak sortuta, European Museum of the Year Awards sariak museoen bikaintasuna eta berrikuntza aitortzen dituzte. Azken bi urteetan ireki edo berritu diren museoei zuzenduta daude, ikus-entzuleen esperientzia, hezkuntza estrategiak eta gizarte-erantzukizun berritzailea nabarmentzen dituzten proiektuak saritzeko helburuarekin.
