Korrika abian da! Jalgi dadila euskara plazara!

Abian da Korrika! Jai-giroak eta aldarriak, eskutik hartuta, Atharratze bete dute ostegun honetan. Euskalzale komunitateak Zuberoako herria 40 urte ondoren kolorez margotu du, eta dantza eta kalejira artean, Korrikaren lehen lekuko-hartzea Euskal Irratiak egin du.

Goiz-goizean, 10etan, txikiek eman diote hasiera festari. Korrika Ttipiarekin, txaranga, dantzaldi, erraldoi, eta gaiteroek herria hartu dute. Ondotik, 15.00etan, ekitaldia burutu dute AEK-ko kideek herriko plazan. Momentu horretan, plazako botikako termometroak 25ºC markatu du eguzkitan.

Korrika hasi aurretik, AEKko koordinatzaile Ane Elordi igo da oholtza gainera. Behin mezua lekukoaren barnean sartuta, Euskal Irratiek, 90. hamarkadatik egiten duten lana erreibindikatuz, ikurriña zerura eraman dute eta Korrikari hasiera eman diote.

Lehen metroak, emozioz eta jendez lepo (hemen gaude euskararen alde!), oinez, lasai, eta behin plazatik aterata, lasterka. Euskal Herri osoa dantzan dago jada, Korrika bakoitzaren herrietatik pasatzeko irikitan. Defenda dezagun euskaraz ikasteko eskubidea. Gora Korrika eta gora euskara!