Asteklima 2025 Euskadiko Klimaren eta Energiaren Asteak mobilizatzera deituko du gizartea ostiral honetatik, urriaren 17tik, eta ekintza klimatikoa eta energetikoa bultzatzeko 200 jarduera inguru eskainiko ditu hilaren 26ra arte, 'Ekintza oro, txikia izan arren, garrantzitsua da' lelopean.
Ekintza klimatikoa herritarrengana hurbiltzea eta trantsizio energetikoa tokiko mailatik bizkortzea da helburua, antolatzaileek jakinarazi dutenez.
Ihobe sozietate publikoak eta Eusko Jaurlaritzako Industria, Trantsizio Energetiko eta Jasangarritasun Sailaren mendeko Energiaren Euskal Erakundeak (EEE) sustatutako ekimena da Asteklima.
Bada, hamar egunez, udalak, ikastetxeak, unibertsitateak, elkarteak, enpresak eta herritarrak elkartuko dira energia kontsumoari buruzko tailerrak, solasaldiak, hitzaldiak, antzerkia, zinema, lehiaketak, ihes-gelak, erakusketak, ibilbide gidatuak, bisitak, ipuin kontalariak eta aire zabaleko jarduerak biltzen dituen programazioan.
Asteklimak klima aldaketaren aurrean rol aktiboa hartzera gonbidatuko ditu herritarrak, eta jarduerak zenbait esparrutan erantzukidetasuna sustatzeko diseinatu dira, horien artean etxeko energia, mugikortasun jasangarria, kontsumo arduratsua, ekonomia zirkularra, biodibertsitatea eta ingurumen osasuna.
Ekimenaren ardatz nagusietako bat Klima Azoka izango da, Euskal Autonomia Erkidegoko (EAE) hainbat udalerritan jarduera ludikoak egingo dituen azoka ibiltaria.
Guztira zazpi karpa izango ditu hainbat ingurumen gai jorratzeko, hala nola klima aldaketaren arrazoiak, energia, etxeko ohiturak, mugikortasuna, aisialdia, kontsumoa, lurzoruaren babesa eta ikuspegi pertsonaletik aldaketari nola egin dakiokeen ekarpena. Azken helburua da pertsona bakoitzak erronka bat bere gain hartzea, eta ekintzaren batekin konprometitzea.
Klima Azoka Euskadiko Klimaren eta Energiaren Astean egongo da, goizeko eta arratsaldeko ordutegian, Hernani, Getxo, Irun, Zalla, Amurrio, Arrasate, Legazpi, Mungia, Ortuella eta Sobronen.
EKOETXEAK
Azkenik, Euskadi Ekoetxea ingurumen zentroen sareak ere bat egin nahi izan du Asteklimarekin, sareko bost zentroetan garatuko diren klimaren aldeko ekintza jaien egitarau batekin.
Jardunaldiak familia osoarentzat pentsatuta daude eta dibertsioa, ikaskuntza eta herritarren konpromisoa uztartuko dituzte.
Klimaren aldeko ekintza jaiak bi data nagusitan izango dira: igande honetan, urriaren 19an, Urdaibai, Txingudi eta Meatzaldeko ekoetxeetan, eta hurrengoan, urriaren 26an, Azpeiti eta Añana-Sobrongo ekoetxeetan. Banakako 10.000 konpromiso lortzea espero da.
