Basque Culinary Centerrek antolatutakoa

Culinary Action! tailerrak Gipuzkoako ostalaritzaren munduko profesionalak batu ditu

Basque Culinary Centerrek antolatu du ekimen hau  Eusko Jaurlaritzaren Euskadiko Gastronomia eta Elikaduraren Plan Estrategikoaren barruan

17.12.2019 | 19:51
Culinary Action! ekimena.

Basque Culinary Centerrek antolatu du ekimen hau  Eusko Jaurlaritzaren Euskadiko Gastronomia eta Elikaduraren Plan Estrategikoaren barruan

BILBO. Basque Culinary Centerrek antolatutako Culinary Action! tailerrak Gipuzkoako ostalaritzaren munduko hogei profesional inguru batu ditu. Bertan ostalariak, sukaldariak eta enpresariak parte hartu dute, euren esperientzia eta bizipenak partekatuz.

Culinary Action! tailerraren harira, Gipuzkoako hogei bat sukaldari, ekoizle eta ekintzaile arrakastatsu bildu dira LABe-Digital Gastronomy Lab-en (Tabakalera), eta beren esperientziaren berri eman diete negozio bat abian jartzen ari diren edo horretarako asmoa duten gastronomiaren sektoreko profesionalei.

Basque Culinary Centerrek antolatu du ekimen hau, Gastroeconomy eta Hazi Fundazioarekin batera, Eusko Jaurlaritzren Euskadiko Gastronomia eta Elikaduraren Plan Estrategikoaren barruan, eta tailerraren xedea izan da bertako ostalaritza-sektorean eztabaida sustatzea, Gipuzkoako egungo merkatuan parte hartzen duten eta eredu diren pertsonen lekukotzetatik abiatuta. Basque Culinary Centerreko zuzendari Joxe Mari Aizegak topaketaren hasieran adierazi duen moduan, "5 urte daramatzagu ekintzaileei babesa ematen Culinary Action ekimenarekin, eta gaurkoan balioa eman nahi izan diegu sortzen ari diren proiektu berriei eta Gipuzkoako gastronomiako zein euskal gastronomiako talentu ekintzaile berriari". Hasierako ekitaldian parte hartu dute, halaber, Gipuzkoako diputatu nagusiorde Imanol Lasak eta Nekazaritza, Arrantza eta Elikagaien Politikako sailburuorde Bittor Orozek. 

Bigarren mahai-inguruan, probintziako ekoizpen-kateko beste eragile batzuek gastronomia sortzeko modu berriak eta kontsumo-eredu berriak izan dituzte ardatz. Javi Rivero eta Gorka Rico (AMA), Miguel Cruz (Cárnicas Alejandro Goya), Miriam Saldías (Soronea Barazkiak) eta Manuela Olagarroa (Getariako arrantzalea) ekintzaile gazteek hausnarketa egin dute Gipuzkoako sukaldaritza-kulturaren interpretazio berriari buruz. 

Iñigo Galatas aritu da moderatzaile-lanetan parrilari buruzko hirugarren mahai-inguruan. Parrila gure nortasun-ikurra eta aspaldiko teknika da, eta orain joera gastronomiko bihurtu da lurraldean. Portuetxe eta Ana Mari erretegietako Borja Bereziartuak aipatu duen moduan, "gakoa hornitzailearekiko harremana da. Kalitatezko produktua eskuratzen eta emaitza bikaina eskaintzen tematzen gara". Laia erretegiko Jon Alayak ere adierazi duenez, "parrilan ezin da iruzurrik egin, eta nahitaezkoa da beti produktu ona erabiltzea". Bestetik Aranetako Joseba Odriozolak esan du parrila ez dela "soilik genero ona edukitzea; hori ketzen eta saltzen jakin behar da". 

Gipuzkoako sukaldaritza-kulturak garapen-bide berriak aurkitu ditu zenbait edarirekin lotutako proiektu modernoen bitartez, hala nola sagardoa, garagardoa eta txakolina. Gipuzkoako gastronomiaren alderdi likidoaren sustraiak eta modernitatea ere aztergai izan dituzte topaketan, parte-hartzaile hauek izan dituen eztabaida batean: Ion Zapiain (Zapiain sagardotegia), Amaia Arguiñano (K5 upategiak) eta Gorka González (Gora).

Ikasketak Basque Culinary Centerren egin dituzten ekintzaileek azpimarratu dute oso garrantzitsua dela prestakuntza egokia jasotzea gastronomiaren arloan negozioei ekiteko, eta beren jatetxeak ?Casa 887 (Antonio Carlos Fontoura) eta Vaskito (Iñaki Azkue), eta Together proiektua (Quicksilverrena, Sara Benavente eta Estefanía Argueñalekin)? martxan jartzeko gainditu behar izan dituzten erronken berri eman dute. 

Hoteletako jatetxeen berezitasunak ere eztabaidagai izan dira Culinary Action! topaketan; hain zuzen, horri buruz hitz egin dute Ander Gonzálezek (La Jarana), Oihana Subijanak (Akelarre) eta Iñigo Peñak (Narru), zeinak azpimarratu baitute zer-nolako garrantzia duen jankideak, ostalariaren gainetik.

Donostian negozio berriak jarri dituzten nazioarteko ekintzaileek ere izan dute zeresana, eta beren iritziak jakinarazi dizkiete bertaratu diren guztiei, ikuspegi globalago batetik. Hain zuzen, Bella Bowring (Geralds), Chesko Salas (Ekeko), Paulo Airaudo (Amelia) eta Kevin Patricio (La Madame) izan ditugu gurekin, eta beren negozioak aurrera ateratzeko orduan izan dituzten erronkei eta desberdintasunei buruz hitz egin dute. 

Azkenik, Aitor Arregik hitz egin du eta Elkanoren bilakaeraren berri eman digu, zeina hirurogeiko hamarkadan sortutako Getariako euskal erretegi izatetik 'The World's 50 Best Restaurants' zerrendako 30. postuan egotera pasatu baita. "Betikoa egiten jarraitzen dugu, baina etengabe eboluzionatuz. Sua da lehen sukaldea, nahiz eta orain beste zerbait esaten duten kanpoko zerrendek. Kontua da gainean zenbait elementu jartzea, eta gure lurraldean beti egon dira jende asko bertara erakartzen jakin izan duten pertsonak. Sukaldaritza-mugimendu bat dakarren kultura-iraultza egiten dute".