DBHko zein Batxilergoko ikasleeNTZAT

Hezkuntza Sailak 533 plaza eskainiko ditu 2019-2020 ikasturterako atzerriko ikastaroetarako

Alemanian, Frantzian, Irlandan eta Erresuma Batuan egingo diren ikastaroak DBHko zein Batxilergoko ikasleei zuzenduta daude

09.02.2020 | 11:48
Hezkuntza Sailak 533 plaza eskainiko ditu 2019-2020 ikasturterako atzerriko ikastaroetarako.

BILBO. Hezkuntza Sailak 533 plaza eskainiko ditu 2019-2020 ikasturterako atzerriko ikastaroetarako. Alemanian, Frantzian, Irlandan eta Erresuma Batuan  egingo diren ikastaroak DBHko zein Batxilergoko ikasleei zuzenduta daude. 2020ko udan burutuko dira hiru asteko iraupenarekin.

2019ko uda honetan ere, 533 euskal ikaslek hizkuntzak ikasteko egonaldi hauetan parte hartu dute, edo parte hartzen ari dira egunotan oraindik, 2018-2019 ikasturteko deialdiari esker. Horrela bada, 20 ikaslek egin dute dagoeneko hiru asteko egonaldia Alemanian; beste 50 Frantzian izan dira; 198 euskal ikasle Irlandan; eta Erresuma Batuan berriz, 265 gaztek jaso dute ikastaroa. Dena den, ikasle horietako asko Irlandan eta Erresuma Batuan dira egunotan oraindik: 58 euskal ikasle Dublinen daude abuztuaren 21era arte, eta beste 75 Ingalaterrako Peterborough, Nottingham eta King`s Lynn hirietan, abuztuaren 22an etxera itzultzeko.

Hezkuntza Sailak 2019-2020 ikasturteko lehen hiruhilekoan irekiko du 2020ko udako ikastaroetarako izena emateko epea. 533 plaza horietako bat eskuratu nahi duten ikasleek bete beharreko baldintzak, honako hauek dira:

Aukeratutako hizkuntzan edo hizkuntzetan (ingelesa, frantsesa edo alemana) gutxienik 7 puntuko nota eskuratu izana aurreko ikasturtean.

Aurreko ikasturteko bataz besteko nota eta hautatutako hizkuntzan jasotako notaren arteko batuketan 16 puntu edo gehiago lortu izana.

Ikasleak eskatzen duen plazari dagokion hizkuntza ikasia izan behar du aurreko bi ikasturteetan. Ikasleak 2020an gehienez ere 19 urte betetzea.

Hezkuntza sailak 847.038 euro bideratuko ditu deialdi honetarako. Egonaldi bakoitzak, ondorengo gastuak hartzen ditu barnean: joan etorriko bidaia, Euskadiko hiru hiriburuetatik egonaldia burutuko den herrialdeko hiriraino; bidaia asegurua; matrikula eta ikasketa materiala; ostatua; jatorduak; eta ikastaroa burutuko den ikastetxerainoko hiri-garraioa.