Zirrikituetatik begira

Bost gramo

24.07.2020 | 00:24
Bost gramo

CORREOS-eko bulegoan, metakrilatoaren atzean dagoen langileari pasatu diot gutunazala. Ingalaterrara bidali behar ditudan bi liburu daude barruan. Gizonak balan-tzaren gainean jarri du eta pantailak dio bere pisua bostehun eta bost gramokoa dela. Azaldu didanez, bostehun gramora arteko prezioa sei euro ingurukoa da; hortik aurrera, hamahiru eurotik gorakoa. "Folio bat da", esan dit, nahi izanez gero gutunazaletik orriren bat edo zerbait kentzeko aukera emanez, kilo erdia ez gaindi-tzeko. Azaldu diot bi liburu direla, eta ezin diedala orririk kendu. Metakrilatozko isilune bat egin da bion artean. "Bost gramo dira, besterik ez", esan diot, malgutasun pixka baten zain. Bostehun markatzen baduzu inor ez da konturatuko, esanez bezala. Baina ez, makina baten antzera erantzun dit: "Bostehun gramoak gainditzen ditu, hamahiru euro eta hirurogei dira. Zuk ikusi". Eta pentsatu dut maskara baten atzean errazagoa dela makina baten antzera jokatzea.

Ez dut nik salatuko langilearen jarrera, aginduak bete besterik ez duelako egin, bere lana egin duelako, besterik ez, baina pena sentitu dut, pentsatu dudalako birusaren ondorioz ezarri zaigun urruntze sozial honek, bestelako urruntze asko ekar ditzakela. Edo agian urruntze honek inoiz baino argiago utzi duelako lehendik ere urrun-tzen gindoazela elkarrengandik, gizarte honetan gero eta zailagoa dela bestearenganako enpatia agertzea, bestearen arazoak, arazoak baino gehiago bestearenak direla gero eta gehiago. Zuk ikusi. Nik uste bi hitz horiek egin didatela min gehien, hamahiru euroak ordaindu beharrak baino. Zure arazoa da, ez nirea, esateko modu hotz horrek.

Txartelarekin ordainduko dudala esan diot, eta orduan berak esan dit ea nahi dudan zifra borobildu. Botoi berdeari emanez gero, hamalau eurora arteko diferentzia hori Correos-ek bultza-tzen duen proiektu sozialen bat laguntzeko bideratuko dutela, bestela gorria zapaltzeko. Botoia zapaldu dudan une horretan bertan konturatu naiz birusa baino kutsakorragoa dela elkartasun eza. Irtetean, gaizki sentitu naiz. Dena bost gramorengatik.

Más información