LAUDIO. Koronabirusak eragindako konfinamenduak adineko pertsona asko euren etxeetan utzi egin ditu. Hori dela eta, Laudioko Udalak ekimen berri bat abiarazi du, herriko pertsona nagusiak laguntzeko helburuarekin. Horrela, 80 urtetik gorako 300 biztanle ingururi dei egin diete udaletik euren egoeraz galdetzeko eta zeozer behar duten ala ez jakiteko.
Loli Muriel Gizarte Ongizate, Lankidetza eta Osasun Saileko zinegotziak jakitera eman duenez, "Krisi sanitario honen hasieratik, udalerrian 80 urte baino gehiago dituzten pertsonei, bakardadean bizi direnei edo adinean aurrera egin ahala behar bereziak dituztenei arreta espezifikoa eta zuzena ematea erabaki genuen".
Hori dela eta, "astero 300 pertsona baino gehiagoren zerrenda osatzen dugu, haien osasun eta animo egoeraren berri izateko, eta edozein udal arloren edozein zerbitzu edo laguntza behar duten jakiteko", gaineratu du zinegotziak.
Dei horiek gizarte-zerbitzuek osasun-larrialdiko egoera horretan egindako beste ekimen batzuei gehitu behar zaizkie, hala nola egoera bereziki ahulean dauden pertsonentzako gizarte-larrialdiak indartzea, bakardadeagatik arriskuan dauden adinekoei arreta ematea edo kalera irten ezin dutenei elikagaiak eta/edo botikak ematea.
Era berean, "Udaletik gogorarazi nahi dugu auzokideren batek udalaren laguntza behar dezakeen egoeraren bat ezagutzen badu, udaleko gizarte-zerbitzuekin harremanetan jar daitekeela 94 403 48 40 telefono-zenbakiaren bidez, Gizarte Ongizate arloko profesionalek beren kasua baloratu ahal izan dezaten eta beren beharrak konpontzeko beharrezkoa den neurrian esku har dezaten", bukatu du Loli Muriel Gizarte Ongizateko zinegotziak.
