Kostaldea

Bermeo, 'Haurren Aurrean, helduok heldu' kanpainarekin

21.11.2021 | 19:51

'Haurren aurrean, helduok heldu' kanpainak kide berri bat du: Bermeo. Udalerriko ikastetxeetako gurasoen elkarteek bat egin dute Euskaltzaleen Topaguneak Eusko Jaurlaritzaren laguntzarekin batera martxan jarritako ekimenarekin.

Kanpaina honen helburua da 0-12 urte bitarteko umeekin harreman zuzena duten pertsonen artean (gurasoak, hezitzaileak, lagun helduak, zaintzaileak, umeekin egoten diren bestelako senideak€) euskararen erabilera sustatzea. Kanpaina azaroaren 22tik abenduaren 5era bitartean gauzatuko da.

Ekimen honen helburua ez da helduek umeei euskaraz egitea, baizik eta helduen artean hizkuntza ohiturak aldatzea, euren arteko harremanetan euskara hizkuntza nagusia bihurtu dadin. Herritar multzo hau batzen den eremu informaletan kokatuko da dinamika (ikastetxeen kanpoaldean). Bermeoko kasuan, San Frantzisko Herri Ikastetxean, Sagrado Corazón Ikastetxean eta Eleizalde Ikastolan. Bertoko gurasoen elkarteen bitartez gauzatuko da kanpaina.

Umeen erreferente eta gertuko diren helduen arteko hizkuntza portaeretan eragitea eta euskararen erabilera areagotzea; eta horrekin, belaunaldi berriek hizkuntza praktika berriak normalizatu eta barneratzea da 'Haurren Aurrean, helduok heldu' kanpainaren xedea.

Helduei ariketa egiteko honako urratsak egitea proposatzen dizkie kanpainak:

  • Pentsatu norekin alda ditzakezun hizkuntza ohiturak parkean, eskola inguruan edo umeekin egiten dituzun bestelako ekintzetan / eremuetan.
  • Kide horiei elkarrekin ariketa egitea proposatu.
  • Informatu zure ingurua ariketa egitera zoazela umeekin partekatzen dituzun espazioetan zaudenean.
  • Ariketa soziala egin.
noticias de deia