GernikaLumon kokatzen den baina bere eragina eskualde osoan daukan Lanbide Ekimenak Zentroak Gernikaldeko 59 enpresen artean "lankidetza-sareak sortzearen aldeko apustua egitea erabaki du, enpresa horiek bat egin baitute ekimen honekin". Horrela www.gernikaldea.enpresak.eus plataforma birtuala abiarazi du, "sinadura horien guztien artean lankidetza-taldeak eratzea ahalbidetuko duena". Erakundeak sinergiak eragin nahi ditu plataforma horren barne dauden enpresen artean, euretariko asko sektore ezberdinekoak izanda.
Azaro Fundazioaren lankidetzarekin garatu da proiektua, eta Bizkaiko Foru Aldundiak diruz lagundu du, enpresa-mugimendua sortzeko, kideen arteko lankidetzan, profesionalak konektatzeko konfiantzan eta negozioen sustapenean oinarrituta. "Atariak enpresa-erakundeen ikusgarritasuna eta posizionamendua areagotu nahi ditu, eta, beste alde batetik, inguruko jarduera sozioekonomikoa sustatu", dio Jon Lejarraga Lanbide Ekimenak erakundeko presidente eta Gernika-Lumoko Udaleko zinego-tziak.
Lan-saioak "online egiten dira, webgunetik planteatzen diren ekimenetan prestatzea erabaki-tzen duten kideen presentzia ahalik eta gehien errazteko. Horrela, beraiek aukeratuko dituzte topaketen maiztasuna, ordutegia eta dinamika", diotenez. Eta Lejarragak adierazi duenez, "enpresaburuei laguntza emango zaie beren negozioak zabaltzeko, sinergiak sortzeko, sarean lan gehiago egiteko eta gero eta konektatuago egoteko, eta, gainera, enpresa askotan dagoen eten digitala hausten lagunduko da". Ekimen hori irekita dago langile berriak sar daitezen; alde horretatik, parte hartu nahi duten erakundeak harremanetan jar daitezke "Lanbideren eskualde-bulegoarekin edo Gernika-Lumoko Lanbide Ekimenak erakundearekin (Behargintza)".
Lanbide Ekimenak Zentroa 79.490 euro bideratzen ari da Gernikaldeko inguruko enpresei laguntzeko eta ekonomia sustatzeko proiektuak eta jarduerak bultzatzen jarraitzeko, azalarazi dutenez. "Bizkaia Orekan foruprogramaren barruan (Bizkaiko Foru Aldundiaren tokiko eta eskualdeko lehiakortasuna bultzatzeko programa), lau ekimen babesten ari dira honako hauetara zuzenduta: digitalizazioa eta 4.0 industria, enpresa-kudeaketaren hobekuntza, berrikuntza sustatzea eta enpresen arteko berrikuntza, etabar", gaineratu dute.
