Asteazkenean irekiko da

Lasesarreko etxerik gabekoentzako gaueko aterpetxeak 28 plaza izango ditu

07.06.2020 | 12:29

BARAKALDO. Lasesarreko etxerik gabeko pertsonentzako gaueko aterpetxeak 28 plaza izango ditu. Plaza horietatik 5 emakumeentzat soilik izango dira, gizonengandik bereizita. Aterpetxea hurrengo asteazkenean irekiko da, hilak 10. Pertsona horientzako dauden gainerako zerbitzuak ere eskainiko dira, hala nola Santa Teresako eguneko zentroa eta Caritasek San Bizenten duen jantoki soziala.

Barakaldoko Udal Kirol Erakundeak (UKEk) Lasesarreko kiroldegia eta Ezbai kafetegia laster irekiko direla jakinarazi ondoren hartu da erabakia, osasun-krisiak iraun duen bitartean etxerik gabekoei zerbitzu integrala emateko erabili baitira instalazio horiek.

51 lagunek erabili dute zerbitzua. "Hala ere, Kiroldegian erabili dutenetatik bakar bat ere ez da kalean geratuko, kiroldegia berriro irekitzen dutenean. Guztiek izango dute non bizi", esan du Juan Antonio Pizarro zinegotzi ordezkariak. Hilaren 10ean berriz irekiko den gaueko aterpetxean dauden 27 plazez gainera, plan bat prestatzen ari dira etxerik gabekoek bizi-proiektu berri bat has dezaten.

ETXERIK GABEKO 25 LAGUNENTZAKO OSTATUA

Guztira, 25 lagun horiek dagoeneko hasi dute edo aukera izango dute egun hauetan beste etapa bat hasteko ostatu independente batean. Horietatik 16k, logelak esleituta dituzte Autonomia Erkidegoko udalerrietako etxebizitzetan, Eusko Jaurlaritzaren laguntzari esker (Etxebizitza Sailak Alokabide bidez kudeatutako etxebizitza batean edo Gizarte Gaietako Sailak emandako laguntza ekonomiko baten bidez); beste 5, berriz, behar bereziak dituzten Lortu-Gazteak defendatzeko elkartearen etxebizitzetan hartuko dituzte. Beste 2k, beren kabuz aurkitu dute logela autonomoa beren baliabideekin edo (DSB) Diru Sarrerak Bermatzeko Errentarekin. Beste bat, tutoretzapeko etxebizitza batera joango da, eta bestea, berriz, egoitza batera.

Lanean jarraitzen du Enplegu, Gizarte Kohesio eta Aniztasunaren Kudeaketa Arloak, beste erakunde eta entitate batzuekin -hala nola, Goiztiri eta Agharasekin- lankidetzan, gainerako erabiltzaileek ere bizi-proiektu berri bati ekin diezaioten, nahiz eta lekua ziurtatua duten aterpetxean.

Etxerik gabekoen alde egiten ari den "lan garrantzitsua" azpimarratu du Pizarrok, eta arlo horretan eskualdeko gainerako udalek parte hartu beharra azpimarratu du. "Barakaldotik haratago doan arazoa da, baina, oraingoz, Bilbok eta guk bakarrik dauzkagu etxerik gabekoentzako aterpetxeak", gogorarazi du.

noticias de deia