16. edizioa

Ibaiondok 'Una ría con duende' jaialdi flamenkoa jasoko du

23.02.2021 | 18:04
'Una ría con duende' jaialdi flamenkoaren 16. edizioaren kartela.

BILBO. Hemen da 'Una ría con duente' jaialdi flamenkoaren edizio berri bat. Martxoaren 6an, 13an eta 20an, Ibaiondo barrutiko kaleak erritmo flamenko beteko dira jaialdi honen 16. edizioari esker. Ekitaldiak Bidebarrietako liburutegian, Atxuriko Enkarnazio elizan eta Bilborock aretoan egingo dira, hurrenez hurren.

Larunbata 6an, Aitor Escobar artistaren txanda izango da; eta hilaren 13an, Miren Amuriza eta Askoa Etxebarrieta 'La Pulga'-ren 'Gorria' ikuskizunarena. Biak doakoak dira. Bertara joateko, beharrezkoa izango da Bilbao Kultura webgunean eskuragarri dauden gonbidapenetako bat eskuratzea.

Chico Perezen martxoaren 20ko emanaldiak sarrerak ditu salgai, 5 euroren truke esteka honetan.

MUSIKA EMANALDIAK

Flamenko errezitaldia: 'Iturri berria' (martxoak 6, larunbata, 19:00etan. Bidebarrietako liburutegian)

  • Aitor Escobar – gitarra; Jonatán Jiménez 'El Trinitario' – cante; Alberto Maldonado "El Ratón" – perkusioa; Vanessa Triviño - koroak, jaleos, palmak; Isabel Fernández - koroak, jaleos, palmak.

'Una Ría con Duende' ekimenaren edizio berria martxoaren 6an hasiko da Aitor Escobarrekin. Aitor Escobar musikari bat da, Gasteizen jaioa eta umetatik gitarra flamenkoa jotzen duena. Karrera luze bat egin du nahiz muntaietan nahiz dantza konpainietan, eta, hala, Estatuan zein nazioartean jardun da bere musika jotzen. Oraingo honetan, 'Iturri berria' aurkeztuko du jendaurrean, flamenkoko tradizioa eta modernitatea nahasten dituen lan bat.

Bertso eta flamenkoa: 'Gorria' (martxoak 13, larunbata, 19:00etan. Enkarnazio eliza, Atxurin)

  • Miren Amuriza – bertso; Askoa Etxebarrieta 'La Pulga' - dantza.

13an 'Gorria' ikuskizunaren txanda izango da. 'Gorria' Askoa Etxebarrieta 'La Pulga' dantzari flamenkoaren eta Miren Amuriza bertsolariaren arteko elkarrizketa artistikoa da. Bi adierazpenek helburu bera dute: artisten topaketa. Ikuskizunaren bidez, artista bakoitzak bere hizkuntzan hitz egin eta dantzatzen du, eta kode partekatuak eraikitzen ditu koplaren bidez. Hari gidaria kolore gorria da (bizitza eta heriotza, arriskuak eta debekuak, karga ideologikoa, lotsa, desioa...) eta gatazka indibidual eta kolektiboei buruz hitz egiten dute, gitarra eta perkusioa lagun dituztela eta eszenifikazio hutsa baina zaindua dutela.

Amaierako ikuskizuna: 'Gruserias' (martxoak 20, larunbata, 19:00etan. Bilborock)

  • Chico Pérez – teklatuak; Belén Vega – cante; Carlos Bueno - baxu elektrikoa; Guillermo Hernansaiz – bateria; Antonio 'El Tabanco' – dantza.

Bilborock aretoan aurkeztuko da 'Gruserias', Chico Perezen eskutik, larunbatean, hilak 20. 'Gruserías' kontzertu flamenko bat da, baina solas egiten du beste adierazpide batzuekin, dela jazzarekin edo musika klasikoarekin. Chico Pérezek harresirik gabeko musika proposatzen du, indarra eta dotoretasuna biltzen dituen konbinazio bat, musikari bikainek eskainia, eta flamenkorik garaikideenaren abangoardiaren ordezkari dena.

ERAKUSKETA SAN FRANTZISKOKO LIBURUTEGIAN

'Una Ría con Duende' programazioa osatzeko, San Frantziskoko liburutegian ikus daitekeen erakusketa bat izango da. Flamenkoarekin lotutako materialen erakusketa eta liburuak, CDak eta DVDak maileguan uzteko katalogo zabala eskainiko ditu. Erakusketa martxoaren 10etik 25era bitartean bisitatu ahal izango da.

#BILBAONEGUA2021

#BilbaoNegua2021 otsailean eta martxoan Bilboko auzoak aisiaz eta kulturaz betetzeko diseinatutako udal-ekimena da. Egungo egoerak gehien eragiten dien sektoreetako bati, kulturari, eskua ematearen aldeko apustu horrek publiko guztientzako lehen mailako proposamenak hurbiltzen dizkie Bilboko barrutiei, gustu guztietako planak eskaintzeko pentsatuak.

#BilbaoNegua2021eko hitzorduek zorrotz beteko dituzte osasun-agintariek ezarritako higiene- eta segurtasun-protokolo guztiak, eta, hala, parte-hartzaile guztien osasuna bermatuko da. Maskararen erabilera nahitaezkoa izango da beti.

noticias de deia