Akordioak erdiestea errazte aldera

Doako bitartekaritza-zerbitzua martxan jarri du Bilboko Udalak

26.06.2020 | 10:47
Bilboko denda baten erakusleihoa.

BILBO. Koronabirusak eragin dituen kalteak gutxiagotzeko asmoz, Bilboko Udalak #BilbaoAurrera plana abiarazi du. Plan horren neurrien barruan, doako bitartekaritza-zerbitzua eskainiko du merkataritza-lokalen edota negozioen alokairua ordaintzeko akordioak erdiestea errazteko.

Zerbitzua doakoa da eta gaur hasiko da Bilbao Ekintza udal elkartearen eskutik. Hitzarmenaren helburua da bi aldeen arteko adostasunezko, adiskidetasunezko eta aldeko itunak ezartzea, jarduerak aurrera jarrai dezan laguntze aldera. Edozein kasutan, bide judiziala baztertuta geratzen da.

BEHARKIZUNAK ETA KONTSULTAK

Neurri hori hartzeko, baldintza hauek bete behar dira:

  • Egoitza fiskala edo sozietatearen egoitza Bilboko udalerrian izatea.
  • Koronabirusa kudeatzeko alarma-egoera deklaratzearen ondorioz, jarduera aldi baterako eten behar izana.
  • Baldin jarduera araudiak etendakoen artean ez badago, alarma-egoeraren deklarazioak irauten duen hilabeteen fakturazioa gutxienez % 75 murriztu izana, 2020ko martxoa baino lehenagoko seihileko naturalaren hileko batez bestekoaren aldean.
  • Hala ere, eskaera egiten den egunean, jardunean egon beharko du.
  • Pertsona juridikoen kasuan, zuzenean edo zeharka baldintza horiek betetzen ez dituzten enpresen % 25etik gorako partaidetza ez izatea.
  • Alarma-egoera deklaratu aurretik ekonomia-jardueren gaineko zergan alta emanik egotea (2020ko martxoaren 14a).
  • Autonomoen Araubidean edo arlo horri dagokion araubidean alta hartuta izatea.
  • Negozio-lokalaren errentamendu-kontratua edukitzea, baldin eta interesduna familia-etxebizitza baten parte ez bada eta/edo lokalaren errentatzailearekin 2. mailara arteko odolkidetasun- edo ezkontza-ahaidetasunik ez badago, eta baldin errentatzaile gisa jarduten duen pertsona fisiko edo juridikoaren bazkide edo partaide ez bada.

BILBAO AURRERA PLANA

Zerbitzu berri hau #BilbaoAurrera planaren parte da. Gizarte, Ekonomia eta Kultura Arloko Larrialdietarako Programa da, 15 milioi eurokoa, eta 50 neurri baino gehiago jarri ditu abian koronabirusak pertsonengan eta enpresetan eragiten duen osasun-krisiaren ondoreak arintzeko eta ohiko jarduerak suspertu eta berreskuratzeko. Plan hau Bilboko Udaleko talde politiko guztiek prestatu eta adostu dute.

Beste neurri ekonomiko batzuen artean, laster abian izango diren zuzeneko laguntzak onartu dira ETE, mikroenpresa eta autonomoentzat, Covid-19aren aurkako segurtasun-protokoloek eragindako gastuei aurre egiteko eta babesteko materiala erosteko, guztira 500.000 euro. Enpresentzako zerga-pizgarriek murrizketa eta hobari ugari dituzte zerga eta tasetan, eta 3 milioi euro gutxiagoko eragin ekonomikoa izango dute.

Bilboko Eskualdeko Merkataritza Elkarteei ematen zaizkien diru-laguntza izendunak % 100 handituko dira, eta orain 276.000 euro izango dira. Handitze horren helburua merkataritza-jardueradinamizatzeko eta Bilboko auzoetan kontsumoa sustatzeko eta zuzpertzeko ekintza bereziak bultzatzea da, eta, horrez gain, tokiko elkartegintza indartzea, elkarteok egiten duten lan garrantzitsuagatik.

noticias de deia