Atzo aurkeztu zuten

Etxerik gabeko 328 pertsonentzako deseskalada-plana prestatu du Bilbok

06.06.2020 | 04:00
Udalak kirol guneetan instalatutako oheak.

BILBO. Atzo goizean, Juan Mari Aburtok Bilboko Udalak etxerik gabeko 328 pertsonarentzako prestatutako Deseskalada-Plan Estrategikoa azaldu zuen. Pertsona horiek orain arte kirol instalazioetan egon dira, baina horien berehalako irekiera dela eta, irtenbide berriak bilatu behar izan ditu Udalak. Prentsaurrekoan, alkatearekin batera, Juan Ibarretxe Gizarte Ekintzako zinegotzia eta Itxaso Erroteta Gazteria eta Kirol Saileko zinegotzia agertu ziren.

Alerta egoera dekretatu zen unetik beretik, Bilboko Udalak larrialdiko harrera-sistema bat antolatu zuen urian gizarte-bazterketa pairatzen duten pertsona guztientzako. Krisi sanitarioak iraun duen artean, Bilboko Udalak hainbat eremu prestatu ditu bost udal kiroldegitan (Errekalden, Txurdinagan, Bilbao Arenan, Deustun eta La Casillan), eta beste baliabide batzuk ere bai, gizarte entitateekin elkarlanean, Udalaren Harrera Zerbitzuaren ohiko sarean. Instalazio horietan guztietan, zerbitzua eman da gauez eta egunez, osasunerako, higienerako, janzteko eta elikatzeko oinarrizko beharrizanak betetzeko modua eskainiz.

Alkateak jakitera eman du amaitu dela jada etxerik gabeko pertsonak udal kiroldegietan egin duten egonaldia. Atzenengo egunotan, instalazio horiek apurka-apurka hustu dira, eta ohiko jarduerara itzuliko dira arian-arian, eta Desutuko kiroldegia eta La Casilla izango dira atzenengoak husten.

Iragarri genuenez, #BilbaoAurrera Planak hainbat neurri jasotzen ditu urian gizarte-kohesioari eusteko, eta guztira 2,2 milioi euroz hornituta dator. Gainera, Bilboko Udalak, Eusko Jaurlaritzak eta hirugarren sektoreko entitateek badute elkarrekin programa berezi bat, 2 milioi eurokoa, aldi baterako ostatua eta mantenua bermatzeko, eta gizarte baliabide beren-beregikoak bideratzeko (alegia, hezkuntza eta prestakuntza), hain zuzen, itxialdi egoeran diagnostikatu diren profil batzuei eta besteei egokitutako baliabideak.

Handitu egin da Gizarte Larrialdietako Laguntzen (GLL) urteko zenbatekoa -4,9 milioi euro-, Eusko Jaurlaritzak ezarritako zuzkidura gehigarriarekin, zeina 3.460.000 eurokoa baita; oinarrizko beharrizanei erantzuteko izango da diru-partida hori: elikadura, garbiketa eta higiene produktuak, eta etxebizitzen mantentzea.

Salbuespenezko funts horren kontura, 4.615 "elkartasun txartel" banatu zaizkie baliabiderik gabeko pertsonei, ohiko eran egin ditzaten erosketak uriko supermerkatuetan, gutxi gorabehera milioi bat euro ipinita. Era berean, Elikagaien Bankuak 255.087 kilo janari banatu ditu Bilboko 16.281 pertsonaren artean.

Bestalde, Urian bakardade egoeran geratzeko arriskua duten adinduen arreta ziurtatzearren, Bilboko Udalak 36.670 dei egin dizkie 65 urte baino gehiagoko pertsonei; herritarren kolektibo horren erdiari, ia-ia (biztanleria osoaren % 24 da kolektibo hori). Horrez gain, Etxez Etxeko Laguntza Zerbitzuaren 3.000 erabiltzaileekin etengabea izan da harremana.

Horrela, Bilbok osatu egiten ditu Gizarte Zerbitzuek larrialdi sanitarioko egoera honetan abian jarritako baliabideak, hala nola gizarte larrialdiko antolamenduak etxerik gabeko pertsonentzat, arreta eskaintzea Urian bakardade arriskuan diren adinduei eta ELZ etxeko laguntza zerbitzuaren erabiltzaileei (3.000 erabiltzaileei deitu zaie etengabe), eta Oinarrizko Gizarte Zerbitzuen telefono bidezko arreta 010 telefonoan bateratzea, beste erabaki batzuen artean.