Galdakaoko Boluntarioen Gizarte Elkarteak kalean egin zuen janari banaketa joan den ostiralean. Kurtzeko plazan egin zuten, bere lokala txiki geratu zaielako. Une honetan, ezinezkoa da beren instalazioetan elikagaiak gordetzen jarraitzea. 12 tona elikagai dira hilero, eta “horrela egin izan ez bagenu, elikagai asko bota beharko genituzke, guretzat pentsaezina dena”, adierazi dute elkartetik. Gainera une honetan “elikagaiak behar dituzten pertsonen kopurua bikoiztu egin da”, diote. Horrela, Galdakaoko 600 pertsonei banatzen dizkiete orain elikagaiak. Horregatik, “janaria gordetzeko lekurik gabe geratu gara. Eskaerak areagotu egin dira eta ezinezkoa da daukagun lokalean biltegiratzea”. “Udalerriko bizilagunei hainbat eskaera egin ondoren, eta Udalari modu formalean lokal bat eskatu ondoren, ez da erantzunik izan”, beraz, banaketa hori kalean egitea erabaki zuten, azaldu dute. GBGEtik dioten bezala, “ezin dugu horrela jarraitu, zerbait egin behar dugu 600 pertsona hilero elikagairik gabe gera ez daitezen. Egoera jasanezina da“.
Elikagai bilketa
Jaso berri dituzten laguntza-eskaeren gorakadaren ondorioz, elkarteak elikagaiak bildu ditu udalerriko supermerkatuetan janari bilketa handi batean. Guztira, 4.000 kilo elikagai bildu zituen elkarteak joan den maia tzaren 29an eta 30ean Galdakaoko zortzi supermerkatutan antolatu zuen elikagai bilketa honetan. Guztira 3.854 kilo janari bildu dituzte, hala nola olioa, arroza, lekaleak eta esnea, baita haurrentzako zenbait produktu ere. Elkartearen ustez, “bilketa honek Galdakaoko herriaren elkartasuna erakutsi du. Deialdi bereziren bat dagoen guztietan, herriak erantzun egiten du“. Hala ere, nabarmendu dutenez, “bilketa hau aldi baterako irtenbidea da, aste ba tzuk barru berriro elikagairik gabe geratuko garelako. Bazkideak lortu behar ditugu, hilero kopuru bat emango dutenak“. Laguntzeko pertsona laguntzaileak eta bazkide babesleak behar dira. Orain, batez ere, bazkideak behar dituzte, batez ere, elikagaien banaketarako eskaeren gorakadari aurre egin behar zaiolako. Beste alde batetik, lokal berri eta handiago bat behar dutela argi utzi dute kalean elikagaiak banatu eta gero. 635750581 eta 674041438 telefonoetara deitu daiteke laguntza eskaintzeko.
