Aixerrota eta Galeako pasealekua lotzeko bidegorria errealitate bat izango da

Herritarren eskaerei erantzungo die Getxoko Udalak, Andra Mari-Aixerrota inguruko ikastetxeak Galea pasealekuko bizikleta-erreiarekin lotuko dituen bidegorri bat eraikiz.

Bidegorri hori, aldi berean, Algortako erdigunera doanarekin lotuta dago. Konexio berri hori ikastetxeek beraiek eskatu dute, eta, era berean, proiektua azken urteotan Udala udalerri barruan bizikleten zirkulazioa hobetzeko egiten ari den jarduera ugarien artean kokatzen da. Jarduera horien helburua da, hain zuzen ere, Getxo osoan zehar bizikletaz mugitu ahal izateko sare orokor bat eratzea, auzoak lotuz.

Bidegorri zati berriari buruz hartutako irtenbidea bat dator zentro horiek planteatutako beharrekin. Proiektatutako bidegorria galtzadaren mailatik igaroko da zati batzuetan, eta oinezkoentzako eremutik beste batzuetan. Guztira 585 metroko luzera izango du, Galea pasealekuaren eta Eperra kalearen artean, Peña Santa Marinarekin bat egiten duen tokian. 2,20 eta 3m bitarteko zabalera izango du. Bostgarrena kaleko bidegurutzean oinezkoentzako pasabide goratua egingo da, bai oinezkoentzako ibilbiderako, bai txirrindularien ibilbiderako.

Obrak

Obrak egin bitartean, hiri-altzariak desmuntatzea, espaloi, galtzada eta zintarrietako zoladurak eraistea, galtzadako zorua fresatzea eta beharrezko seinaleak jartzea aurreikusten da, besteak beste.

Obra horiek eginez, egungo urbanizazioa ahalik eta gehien errespetatu nahi da, ibilbideei, zuhaitzei eta hiri-altzariei ahalik eta gutxien eraginez. Ahal den neurrian, egungo zuhaiztia kontserbatuko da, eta, bestela, behar diren unitateak inguruko berdeguneetara lekualdatuko dira.

Obrak apirilean hasiko dira, esleitutako lanen kontratua formalizatu eta egiteke dauden administrazio-izapideak gainditu ondoren. Aurreikusitako exekuzio-epea zortzi astekoa izango da. Esleipen-aurrekontua 89.036 eurokoa da.