Ur kiroletako txartelak gailu mugikorretan eraman daitezke jada NIK Patrika Digitalarekin

Eusko Jaurlaritzako Elikadura, Landa Garapen, Nekazaritza eta Arrantza Sailak urrats berria egin du ur kiroletako txartelen erabileran: hemendik aurrera, NIK Patrika Digitala aplikazioan integratzeko aukera dago. Horri esker, titularrek beren egiaztagiri ofiziala mugikorrean bertan eraman ahal izango dute.

Horrela, Euskal Autonomia Erkidegoan (EAE) aisialdiko ontziak gidatzeko baimena ematen duen txartela dutenek dokumentua bertsio digitalean eskuratu dezakete jada. Gainera, behar denean erakutsi ahal izango dute, formatu fisikoak duen balio juridiko bera aitortuta, iturri ofizialek azaldu dutenez.

Aplikazio honek, NIK Patrika Digitalak, dokumentu ofizialak modu seguruan gordetzea eta kudeatzea errazten du, gailu mugikorretik bertatik. Horrela, joan-etorri asko ekidin daitezke, eta, aldi berean, txartel fisikoa galtzeko edo hondatzeko arriskua txikitzen da. Ekimen hau administrazioaren digitalizazio-prozesuan aurrera egiteko eta herritarrekiko harremana eguneratzeko beste pauso bat dela nabarmendu dute.

Amaia Barredo sailburuak azaldu duenez, neurriak gero eta handiagoa den eskaerari erantzuten dio. Bere hitzetan, “kirol txartel nautikoak NIK Patrika Digitalean sartzeak gure zerbitzu publikoak modernizatzeko bidean aurrerapauso sendoa dakar, eta erabiltzaileei beren titulazioa edozein momentutan egiaztatzeko modu eroso, seguru eta erabat balioduna eskaintzen die”.

Txartela patrika digitalean gehitu nahi dutenek aplikazioa instalatu behar dute (Play Store eta App Store bidez eskuragarri), identifikazio elektronikoko sistema bat izan (BakQ edo baliokidea), eta ondoren aplikazioan sartu dagokion lizentzia deskargatzeko.