Amorebieta-Etxanok ostiralean piztuko ditu Gabonetako argiak
Argien piztearekin, herritarrek hainbat jardueraz gozatzeko aukera izango dute datozen egun eta asteetan
Datorren ostiralean, abenduaren 5ean, emango die hasiera Gabonei Amorebieta-Etxanoko Udalak, argien piztearekin. Ekitaldia arratsaldeko 18:00etan izango da, Herriko Plazan, eta horrekin Udalak prestatutako jardueraz eta magiaz betetako egitarauari emango zaio hasiera. Ekitaldian Beñat Egiartek eta Jaume Gamindek parte hartuko dute, txokolatada egongo da herritarrentzat, eta Zubiar Musika Eskolako abesbatzak eta Triki Piu taldeak girotuko dute plaza.
Aurten, gabonetako argiztapenak hainbat berrikuntza dakartza. Zuhaitz berria jarriko da Herriko Plazan, aurreko urteetakoak baino handiagoa, eta lehen aldiz plazako aldeetako balkoiak apainduko dira, herriguneari irudi berritua emanez.
Gainera, beste puntu batzuetan ere apaingarri berriak jarriko dira. Kaitana plazan, aurreko urteetan Herriko Plazan egon den zuhaitza jarriko da, eta Enrike Renterian Gabolak kokatuko dira. Zelaieta parkean haurrentzat pentsatutako bola handi bat jarriko da, barruan eserlekuak izango dituena eta nahi adina aldiz doan sartu-irten ahal izango dena.
Argiztapen osoa LED teknologiarekin egina izango da, energia-kontsumoa gutxitzeko. Argia piztuta egongo da abenduaren 5etik urtarrilaren 6ra arte, eta gauero 00:00etan itzaliko da, giroari eutsi baina eraginkortasun energetikoa bermatuz.
Gabonetako egitaraua
Abendu osoan zehar eta urtarrilaren 5era arte, Amorebieta-Etxanok herritar guztientzat pentsatutako egitarau zabala eskainiko du, haurrak izanik ospakizun hauetako protagonista nagusiak. Haurrek tailerrak, ipuin kontalariak, antzerkia, haur-parkea, tren txu-txua eta beste hainbat jarduera izango dituzte eskura.
Horrez gain, egingo dira gabonetako azoka, abestiak, kontzertuak, kirol-probak, dantza ikuskizunak, zinema eta Gazte Gabonak egitasmoa, gazteentzako pentsatua.
Aurten, gainera, SDAk (Sociedad Deportiva Amorebieta) bere 100. urteurrena ospatzen du. Urteurren hori dela eta, ¡Aupa Azules! dokumentala proiektatuko da abenduaren 12an, 13an eta 14an, 20:00etan Zornotza Aretoan. Sarrera doakoa izango da.
Ohiko ekitaldiak ere ez dira faltako. Abenduaren 24an, 17:30ean, Olentzero eta Mari Domingi kalez kale ibiliko dira: Gudari, Nafarroa, Ibaizabal eta San Migel zeharkatuko dituzte, eta Zelaieta Zentroan amaituko dute ibilbidea, harrerarekin.
Urtarrilaren 5ean, ordu eta ibilbide berean, Errege Magoen kabalgata izango da, gabonetako programazioari amaiera emateko. 10 urtetik gorako haurrak erregeen paje gisa parte hartu nahi badute, abenduaren 9tik 26ra izena eman ahal izango dute Gazte Informazio Bulegoan.
Egitarau honekin, Amorebieta-Etxano prest dago Gabon giroz, jarduerez eta lagun edo senideekin partekatzeko unez betetako egunak bizitzeko.