6.500 pertsonak baino gehiagok parte hartu dute urrian Bizkaiko Ondarearen Europako Jardunaldietan

Erreferentziazko kultura-hitzordu gisa finkatu dira Bizkaian Ondarearen Europako Jardunaldiak. Aurten ekimen honen 25. edizioa ospatzen ari da, eta aurrekoetan bezala, harrera bikaina izan du. Bizkaiko Foru Aldundiak ezagutzera emandako datuen arabera, 6.500 pertsonak baino gehiagok hartu dute parte urrian zehar.

Programazioa askotarikoa izan da: 268 ekitaldi eskaini dira, 76 udalerritan. Lurraldetik hainbeste zabaltzea izan da posible 79 kultura-erakunderen, 54 udalen eta 27 museoren inplikazioari esker, Bizkaiko Foru Aldundiaren eskutik, eta horrek erakusten du lankidetza-sare sendoa dagoela.

Jatorriari dagokionez, nabarmentzekoa da bizkaitar gehienak ( % 58) beren udalerritik atera zirela jardueretan parte hartzeko, eta horrek islatzen du interes handia dutela beste herrietako ondarea ezagutzeko. Bestalde, % 37k bere udalerrian bertan egindako jarduerak aukeratu zituen, eta % 5 Bizkaitik kanpo etorri zen, zehatzago, EAEko beste lurralde eta Estatuko probintzietatik.

Esperientziaren balorazio orokorra bikaina izan da. Parte-hartzaileek 10etik 9,16ko batez besteko puntuazioa eman diete jarduerei, eta, jardunaldiei orokorrean, 10etik 9ko nota. Datu horiek agerian uzten dute poztasun-maila handia izan dela Bizkaiko ekitaldiaren programazioarekin eta antolaketarekin.

Adinari dagokionez, inkestatutako gehienak - % 58,9 - 60 urtetik gorakoak dira, eta, hurrengo ehunekorik altuena 27 eta 59 urte bitartekoena da - % 38 -. Gazteen parte-hartzea txikiagoa izan da: % 2,3k 18 eta 26 urte bitartean zuen, eta % 0,8 soilik izan zen 17 urtetik beherakoa.

Oro har, datuek oso ondo baloratutako ekitaldia erakusten dute, parte-hartze aktiboa eta askotarikoa izan duena, batez ere adinekoen artean. Jardunaldiek milaka pertsona mobilizatzeaz gain, tokiko ingurunetik haragoko ondarea ezagutzea sustatu dute.

Jardunaldiek ondare-komunitatea indartzen dute, eta belaunaldien arteko elkarrizketa eta ezagutza partekatua bultzatzen dute. Kultura-programa horren bidez, gizarte-kohesioa ere sustatzen da, kulturak eta ondare komunak pertsonak lotzen baitituzte. Herritarren inplikazio horrek, kultura-esperientzia aberasteaz gain, lankidetza-sarea sendotu eta lurraldeko gizarte-ehuna indartzen du.