Asteburuan zehar Mundakak Euskal Jaiaren edizio berri batez gozatuko du, bertan euskal folklorea, musika eta tradizioa protagonista nagusi izango direlarik. Jaia gaur hasi da eta igandera arte iraungo du hainbat jarduerekin.
Euskal Jaia Mundakako kultur egutegian gehien espero den uneetako bat da. Abuztuko azken asteburuan, herriko kaleak eta plazak jantzi tipikoz, herri-musikaz, dantza eta kirol tradizionalez eta erromeriaz betetzen dira, herriaren nortasun eta kultura partekatuaren erakusgarri.
Egitarauak musika emanaldiak, kalejirak, dantzak, eta erromeriak biltzen ditu, baita txistulariak eta beste folklore adierazpen batzuk ere, herritar eta bisitariak jai giroaz gozatzera gonbidatzen dituztenak.
Programazioari dagokionez, bihar, abuztuak 29 Mundakako abesbatzaren ohiko kontzertua izango da 20.00etan, eta larunbatean goizeko 11.00etatik aurrera Jose Mari Egileor txistulariekin hasiko da eguna, Marmita txapelketa, esku pilota partidak eta Zazpizar taldearen erromeriarekin jarraituz. Jardunaldia Larrain dantza dantzatuz amaituko da 00.15etatik aurrera. Jaia igandean bukatuko da, mezaren ondoren Kalez kale kantari ospatuko delarik, eta eguerdiko 13.00etatik aurrera Euskal Jaia ospatuko da Talako sarreran.
Mundakako Udalak adierazi duenez herritar guztiak gonbidatu nahi ditu “tradizioa, kultura eta bizikidetza esparru paregabean batzen dituen ospakizun kolektibo honetan parte hartzera eta bat egitera”.
