Bizkaia hondakinen gaikako bilketan hazi da 2024an

Hiri Hondakinen Behatokian hondakinen gaikako bilketari buruzko 2024ko datuak eman ditu ezagutzera. Txosten horren arabera, Bizkaian hondakinen bilketak aurrera egin zuen iaz.

Masa-bilketaren sistema erabiliena izan arren, gaikako bilketa gero eta gehiago hedatzen ari da. Horrek erakusten du herritarren ohiturak etengabe aldatzen ari direla.

Bildutako kopuru osotik, 305.147 tona gaikako bilketakoak dira; 2023an, berriz, 292.476 tona bildu ziren, eta horrek esan nahi du bilketa ia % 5 igo dela. Aurrerapen horri esker, masa-bilketaren kopuruarekin (329.976 tona; % 51,95) berdintzen ari da.

Frakzio organikoak goranzko joerari eusten dio

Txostenaren datu adierazgarrienetako bat da frakzio organikoaren bilketak etengabe gora egin duela; izan ere, 2024an 11.354 tona bildu ziren, hau da, aurreko ekitaldian baino % 5 gehiago. Igoera horren arrazoiak hauek dira: batetik, edukiontzi marroiaren erabileraren hedapena, eta bestetik, hondakinak bereizteko ohitura sendotzea herritarren artean.

Beste frakzio batzuetan ere joera positiboari eutsi zaio:

• Ontzi arinak: lehenengo aldiz, 22.000 tonatik gora; guztira, 22.057 tona bildu dira.
• Papera-kartoia: % 5 igo da aurreko urtearekin alderatuta; bi urtez geldirik egon ondoren, 33.284 tona bildu dira.
• Beira: apur bat igo da 28.736 tonara iritsi arte, eta hamar urtez izandako gorakada jarraitua finkatzen da.
• Berrerabilgarrien frakzioa (ehungintza, jostailuak, oinetakoak...): hiru urtez jarraian gora egin ondoren, 4.724 tonara iritsi da.
• Hondakin handiak: 10.651 tona bildu dira, eta pandemiaren ondoriozko gorakada izan ondoren, 2022an hasitako egonkortze-mailak mantendu dira.

Hondakinen tratamenduari dagokionez, konpostajeak gora egin du, eta inoizko mailarik altuenera iritsi da: 19.710 tona, hau da, guztizkoaren % 3,29. Berrerabiltzeko eta birziklatzeko beste gaikako bilketek ere gora egin dute, zehazki, 11.004 tona bildu dira (gutizkoaren % 48,63). Balorizazio energetikoari dagokionez, 197.218 tona tratatu dira ( % 32,92), eta beraz, egonkor mantendu da.

Balorizatu barik hondakindegira eraman diren hondakinen kopurua (90.000 tona) ez da aldatu aurreko urtearekin alderatuta. Bereziki nabarmentzekoa da hondakin gordinaren murrizketa; izan ere, 9.514 tonara jaitsi da, kudeatutako guztizkoaren % 1,59.