EAJ-k eta PSE-EEk osatutako Durangoko gobernu taldea PP eta EH Bildu udal taldeekin negoziatzen jarraitzen du, 2025erako aurrekontuak aurrera ateratzeko ahaleginean. Herriaren Eskubideak ez du negoziazioetan parte hartu eta osoko zuzenketa aurkezteko asmoa iragarri du.
Aurrerapenak EH Bildurekin eta PPrekin izandako negoziazioetan
Urrian negoziazioak hasi zirenetik, Udal Gobernuak hainbat bilera egin ditu EH Bildurekin, eta guztira 5 zuzenketa aurkeztu zizkion 2025eko aurrekontu proiektuari. Bilera horietan, Udal Gobernuak koalizioari galdetu zion zenbat proposamen onartu behar ziren abstentzio bat justifikatzeko eta zenbat aldeko botoa lortzeko. EH Bilduk negoziazio-prozesuan baiezko botoa bere zuzenketak osorik onartzearen baldintzapean jarri zuen, eta Udal Gobernuak guztiak onartu ditu.
"EH Bilduk aurkeztutako proposamen guztiak landu eta onartu ditugu, eta horrek erakusten du elkarrizketarekin eta akordioa bilatzearekin konpromiso argia dugula aurrekontuei begira. Gure ustez, proposamenak osorik onartuta, haien kezkei erantzun zaie eta haien ekarpenak integratzeko eta 2025eko aurrekontu-proiektua aberasteko lan egin da. EH Bilduren udal talde osoari eskua luzatzen diogu behin betiko akordio baterantz aurrera egiteko eta 2025erako aurrekontuen egonkortasuna eta bideragarritasuna bermatzeko."
Bestalde, Alderdi Popularrak 7 zuzenketa aurkeztu ditu, eta negoziazioak norabide positiboan ari dira aurrera egiten. Gobernu-taldeak alderdi politiko guztiekin hitz egitea baloratzen du, betiere ahalik eta adostasun handiena lortze aldera, udalerriaren mesederako.
Aurrekontu ausarta eta partekatua Durangorako
Udal Gobernuak aurrekontu ausarta, inklusiboa eta partekatua lortu nahi du, Durangoko herritarren beharrei erantzuteaz gain, udalerriaren etorkizuna eraikitzeko tresna ere izango dena. Udalak 42.869.253,54 euroko aurrekontua izango du 2025eko ekitaldirako, hau da, aurreko urtean baino % 0,69 gehiago.
Gobernu-taldeak bere gobernu-programaren ildo estrategikoak garatzen jarraitzeko duen konpromisoa islatzen du, herritarren ongizatea, azpiegiturak hobetzea, enplegua sortzea eta ekonomia dinamizatzea bermatzeko. Aurrekontu honek zerbitzu publikoen egungo eskaerei ere erantzuten die, eta hori guztia udalerriarentzat beharrezkoak eta estrategikoenak diren inbertsioei lehentasuna emanez. "Hori guztia aurreikusitako egutegiaren arabera betetzen ari garen Legegintzaldi Plana oinarri hartuta" nabarmendu dute Mireia Elkoroiribe alkateak eta Jesica Ruiz eta Josune Escota alkateordeek.
Durangoko oraina eta etorkizuna guztion artean eraikitzea da helburua, eta, horretarako, udal taldeen babesa bilatzen jarraitzen du gobernu taldeak, beti interes orokorra lehenetsiz alderdien arteko desberdintasunen gainetik.
2025eko aurrekontua abenduaren 18ko osoko bilkura ohikoan bozkatzea aurreikusten da.
