Bermeoko Frantziskotarren klaustroak José Ángel Lasaren erakusketa jasoko du
Larunbat honetan, maiatzaren 11n, 13:00etatik aurrera, ikusi ahal izango da Bermeoko Frantziskotarren klaustroan José Ángel Lasa eskultorearen '-n, -z, -tik, -rantz' izeneko eskultura erakusketa. Inauguraziora herritar guztiak gonbidatu ditu José Ángel Lasak, bere lanaren xehetasunak gehiago ezagutu ahal izateko. Erakusketa 50 eskultura baino gehiagoz osatuta dago.
Frantziskotarren klaustroa jantzi du Jose Angel Lasa eskultoreak; 40 urteko lanaren lagin bat erakutsiko du gaur hasi eta urrira bitartean. Legorretakoa bada ere, Bermeon bizi da, Arane auzoan. Naturan bilatzen dituenak berrerabiltzen ditu, eskultura bihurtuta. Eskarmentuduna da mundu horretan.
Inguruan aurkitzen dituenak erabiltzen ditu Lasak bere lanetarako; berrerabileran oinarritzen da. Esaterako, erakusketa honetako 16 pieza, aurtengo neguan haizeteek Lameran botatako zuhaitzen zatiak direla dio. Almerian gorrotatzen dituzten erratzak, hiltzear zeuden Valentziako laranjondo zatiak, etxean egin zuten magnolia baten inausketa… “Nik ez ditut zuhaitzak botako, hondakinak dira edo inork gura ez dituenak. Ingurutik jasotzen ditudanak berrerabiltzen ditut”, dio artistak.
“Zaila” dela dio inspirazioa nondik datorkion esatea: “Badakit gauzak kontatzeko jarrera hau daukadala. Pinturarako ez dut jarrera hau izan, ezta argazkigintzarako ere, baina bai ordea gauza hauek egiteko. Suposatzen dut umetatik datorren zerbait izango dela, baina nik ere ez dakit; normalean horretan ari garenok ez dakigu nondik datorkigun inspirazioa”.
Lanaren atzean “intentsitate handia” dagoela dio: “Atapuercara joan, han egon, moztu, kamioi bat lortu, ekarri… lehertuta amaitzen duzu. Ondorengoak ere lan handia dakar, piezetako batek, esaterako, azpitik sei kolore ditu. Frogak eta frogak egiten ditut, gustukoa dudan azken emaitza lortu arte”.
‘-n, -z, -tik, -rantz’ izena jarri dio erakusketari: “Euskarak badu gauza izugarri bat, atzizkiak. Atzizkia ez da ezer zerbaiten ondoan ez badago, eta horrela ikusten ditut gauza hauek. Klaustroaren atzizkiak dira lan hauek. Nik lan hauek bidelagun imajinatzen ditut. Hori ere posible da artearen munduan, XX. mendeak aukera hori eman digu eta errealagoa da; ez bakarrik irudikatu, baizik eta beste gauza batzuk ere. Gaur egun, irudikatu dezakezu, eta horrez gain beste ariketa batzuk egin ditzakezu, eta nik uste dut horretan nabilela pieza hauekin”.