Sestaoko Udalak operatibo berezi bat prestatu egin du datorren ostegunean, apirilaren 11n, itsasadarra zeharkatuko duen gabarra ikusteko. Berrogei urte pasatu dira gabarra nabigatzera atera zen azken alditik, eta jendea gogotsu dago historikoa izango den ekitaldia ikusteko. Horregatik, Sestaoko Udalak operatibo berezi bat prestatu egin du egun horretan itsasadarraren inguruan bilduko diren milaka eta milaka pertsonen segurtasuna bermatzeko.
Sestaon ibaiertzeko lur gehienak enpresek hartzen dituztenez, gabarra gertutik ikusteko aukera La Benedictako kai-muturrera mugatuko da. Ez zaie La Puntara sartzen utziko, eremu horretan segurtasun-neurririk ez dagoelako.
Gaurtik aurrera neurriak hartzen hasiko dira udalerriko bi eremuetako sarbideak apurka-apurka ixteko, baina behin betiko itxiera bihar izango da, gabarraren irteeraren bezperan.
Benediktako kai-muturra: Segurtasun arrazoiengatik, gehienez 720 lagunentzako lekua ezarri da kai-muturraren inguruan. Ontziraleku zaharra, AFISES elkartearekin adostu ondoren, mugikortasun murriztua edo adimenezintasuna duten pertsonentzat izango da, eta puntu horrek 80 pertsona gehiagorentzako lekua izango du (erabiltzaile bakoitzak laguntzaile bat eramateko aukera barne). La Benedicta pasealekua izan daiteke gabarraren pasabidea ikustera herritarrak hurbiltzen diren beste puntu bat, eta kasu honetan ez du edukiera-mugarik izango.
Punta aldea: Ibairako sarbidea, Vicinay Cadenas enpresaren eta Kaiku arraun elkartearen instalazioen artean, debekatuta egongo da ibilgailuentzat zein pertsonentzat, dagoen arrisku handiagatik. Parapetorik edo barandarik ez dagoenez, arrisku handia dago uretara edo ontziraleku zaharraren egituretara erortzeko, horiek hondatuta baitaude.
Bi eremu horietan sarbideak itxita egongo dira hesien, Udaltzaingoaren, Ertzaintzaren eta Babes Zibileko langileen bidez, pertsonen osotasuna ziurtatzeko eta, behar izanez gero, larrialdietako eta segurtasuneko ibilgailuetarako sarbidea errazteko.
Amaitzeko, Udalak herritarrei dei egin die segurtasun dispositibo honen buru diren pertsonen gomendioak bete ditzaten, ospakizun egun historiko hau Bizkaiko gizartearen imajinario kolektiboan betiko grabatuta gera dadin.
