Datorren astelehenetan, ekainaren 26an, Dublinen ospatuko den workshopean Bilbao Bizkaia helmuga turistiko bezala sustatuko dute, Irlandako sektore turistikoarekin merkataritza-harremanak indartzeko.

Dublineko EPIC Museumen egingo den jardunaldia irekitzeko, topaketara bertaratuko diren 13 touroperadoreei eta bidaia-agentziei helmuga aurkeztuko zaie, ondoren, workshop bat garatzeko, non Bizkaiko Foru Aldundiak eta Bilboko Udalak antolaturiko ordezkaritza lagunduko duten lurraldeko 19 enpresetako bakoitzak negozio-bilerak (B2B) izango baititu Irlandako agente turistiko hauekin merkataritza-harremanak ezartzeko edo, hala badagokio, indartzeko.

Lan-topaketa horrekin batera, lurraldea sustatzeko ekitaldi bat egingo da, herrialdeko turismoan espezializatutako hedabideetako 11 kazetarirekin. Bertan, murgiltze-esperientzia baten bidez (360Xperience), Bilbao Bizkaiaren erakargarritasun turistiko nagusiak ezagutu ahal izango dira.

Workshop hau eta komunikabideentzako ekitaldia Bizkaiko Foru Aldundiak eta Bilboko Udalak aurten lurraldea sustatzeko ezarritako ekintzen egutegiaren barruan kokatzen dira. Ekitaldi horretan, sustapen-ekintzen intentsitate-maila desberdina ezarri da, bost aldagai kontuan hartuta:

  • Merkatu bakoitzak Bilbao Bizkaiari ematen dion bisitari-bolumena, termino absolutuetan.
  • Merkatu horretako sarreren eta ostatu-gauen hazkundea urtean zehar.
  • Herrialde bakoitzarekiko konektibitatea handitzea, bai maiztasunari dagokionez, bai plaza-kopuruari dagokionez.
  • Merkatu bakoitzaren errentagarritasuna aztertzea, herrialde bakoitzeko turistek duten erosteko ahalmenari eta gure lurraldean egiten duten batez besteko gastuari lotuta.
  • Eta azken urteetan ezarritako eta kontu makroekonomikoetan ere oinarritutako harreman komertzial edo instituzionaletan hautemandako aukerak.

Erreferentzia horiek oinarritzat hartuta, Irlanda da 2023an jarduketen intentsitate handia aurreikusi zen merkatuetako bat, Estatu Batuekin, Herbehereekin eta Suitzarekin batera. Estatuan, Frantzian, Alemanian, Erresuma Batuan, Italian, Portugalen eta Belgikan batez besteko intentsitateko ekintzak egingo dira, eta intentsitate txikiagoarekin jardungo da Argentinan, Mexikon, Danimarkan, Norvegian, Suedian, Finlandian, Herrialde Baltikoetan, Europako ekialdean, Turkian, Ekialde Ertainean, Asian eta Grezian.