Maiatzaren 2an jarriko dira salgai ekainaren 28tik uztailaren 2ra bitartean ospatuko den Getxoko Jazzaldiaren 46. ediziorako. Ohi bezala, kontzertuak Muxikebarrin egingo dira. Sarrerak Getxoko Kultur Etxeko ohiko kanaletan egongo dira salgai.
Getxoko Jazzaldiaren 46. ekitaldiko abonu-kontzertuetako artisten zerrenda osatuta dago. Dave Holland, generoaren eszenako kontrabaxu-jotzaile oparo eta emankorrenetako bat, eta Kurt Elling, ahozko-jazzaren adierazlea, dira jaialdiko emanaldi nagusiekin bat egiten duten azken izenak, berriki iragarri diren Al Di Meola, Jazzmeia Horn eta Marc Ribot artistekin osatzen direnak.
Kurt Ellingek (1967, Chicago) itxiko du ekainaren 29ko jardunaldia Muxikebarrin, Talde Lehiaketaren emanaldiaren ondoren. Swing kementsuaren eta zolitasun poetikoaren konbinazio bereziagatik ezaguna, abeslari estatubatuarrak leku bat landu du nazioarteko eszenako jazz abeslari garrantzitsuenen artean. Mende laurdeneko ibilbidean zehar, bi Grammy sari eskuratu ditu, eta beste hiru Prix du Jazz Vocal (Frantzia), baita bi Echo sari ere.
Baritono tonu epel eta aberatsagatik berehala ezagutzeko modukoa, birak grabatu eta egin ditu generoko izen handiekin, hala nola Branford Marsalis, Danilo Pérez, Stefon Harris, James Morrison eta Charlie Hunter. Formatu handiko orkestra eta banda garrantzitsuenetako batzuekin ere kolaboratu du, hala nola Clayton-Hamilton Orchestra, National Youth Orchestra, The Bob Minter Big Band, BBC Concerty Symphony eta The Japonipole Orchesra, batzuk aipatzearren. Halaber, John Coltrane, Keith Jarrett, Pat Metheny, Jaco Pastorius, Wayne Shorter eta Joe Zawinul musikarien konposizioetarako letrak idatzi eta grabatu ditu. Oraingoan, Kurt Ellingek Charlie Hunter (gitarra eta baxua), Kenny Banks Jr. (teklatuak) eta Marcus Finnie (bateria) izango ditu lagun.
Bestalde, Dave Hollandek (19467, Wolverhampton; Ingalaterra) emango dio amaiera jaialdiari, uztailaren 2an, igandean. Musikari beteranoa jazz-eszenako kontrabaxu-jotzaile ospetsuenetako bat da, eta generoaren abangoardiaren ordezkari nabarmenetako bat. Estilo desberdinak hainbat ensemblerekin lantzeko duen gaitasunak mende erdiko karrera indartu du arrakastaz beteriko eszenatokietan, baita Grammy sari batzuk eskuratzeko ere.
Bere proiektu propioei ekin aurretik, Hollandek ibilbide sendoa egin zuen, eta ibilbide horretan Miles Davis, Stan Getz, Sam Rivers, Betty Carter eta Anthony Braxton bezalako luminaria-formazioetatik eta Chick Corea, Gary Burton, Jack DeJohnette eta John McLaughlinekin kolaboratu zuen. Bere lider karrera ere arrakastatsua da, duoetan, hirukoteetan edo big bandetan, bere proiektuetan Steve Coleman, Robin and Kevin Eubanks, Jason Moran, Chris Potter eta Eric Harland bezalako izenak bilduz. Kris Dave (pianoa), Jaleel Shawn (saxoa) eta Nasheet Waits (bateria) musikariek kontzertua eskainiko dute.
