39 lokal dira Durangoko Taberna Atseginak

Duela hilabete, adinekoei laguntzeko asmoarekin, Durangoko Udalak Taberna Atseginak proiektuarekin bat egiteko deia luzatu zuen. Ekimen honek, kalean dauden pertsona nagusiei aukera eman nahi zien behar dutenean komunera joateko eta dagoeneko 39 taberna, jatetxe eta eraikin batu dira ekimenera. “Tabernan pegatina bat jartzea bezalako keinu soil batek asko lagun dezake adineko pertsona horiek taberna bateko bainugela erabiltzeko lotsa gutxiago senti dezaten. Ezagutzen ditugu askotan paseatzeko herria zeharkatu nahi ez duten pertsonak, bidearen erdian komunera joan behar dutelako. Horregatik Udalak dinamika hau martxan jartzea erabaki du”, adierazi zuten udaleko ordezkariek.

Gauzak horrela, datozen egunetan pegatina bereizgarri bat jasoko dute izena eman duten negozio guztiek eta pertsona nagusiek establezimendu hori atsegintzat jo dezaten. Horrez gain, adinekoenganako erosotasuna areagotzeko helburuarekin hainbat gomendioren gida bat jasoko dute.