BILBO. Bizkaiko Foru Aldundiak 9,6 milioi euroko aurrekontua bideratuko du, urteko 3,2 milioi euro, istripuen prebentzio, sorospen eta laguntzarako zerbitzua hobetzeko hurrengo hiru urteetan. Dagoeneko kontratua adjudikatzeko prozesua ireki da.
Kontratu honen lizitazioan jasotzen da hondartzetako kanpainaren hiru faseetan zerbitzua zer baldintzatan eman beharko den: uda aurrekoan, non zerbitzua planifikatu eta egituratzen den, denboraldian parte hartzen duten erakunde eta enpresekin bilerak egiten dira, denboraldian erabiliko den materiala eta sorospen-postuak prest jartzen dira, eta sorosleen taldea hautatzen da, besteak beste. Udako fasean, sorospen- eta lagundutako bainu-zerbitzuak ematen dira, datuak eguneratzen dira hondartzen web-orrian, eta hondartzen denboraldian parte hartzen duten erakunde eta organismoekin koordinatzen da; uda osteko fasean, sorospen-postuetako materiala eta ekipamendua kentzen dira, txostenak egiten dira, erabiltzen diren baliabideen inbentarioa egiten da eta emaitzak aurkezten dira.
Hala, besteak beste, baldintza-agiriak ezartzen du enpresa adjudikaziodunak gutxienez 88 sorosle bermatu beharko dituela egunero, modu iraunkorrean, hondartzetan zaintza- eta laguntza-lanak egiteko. Eta beste 8 sorosle izan beharko dituela, beste laguntza-lan batzuetan lagun dezaten; hau da, erabiltzaileek hondartzetako instalazioak eta altzariak behar bezala erabiltzen dituztela kontrolatzeko, okupazio-mailari buruzko informazioa emateko eta hondartza bakoitzean inkestak egiteko.
Halaber, baldintza-agiriak jasotzen duenez, zerbitzuak gutxienez 4 ur-motor, 3 quad, 9 erreskate-buggy, lur orotako 3 ibilgailu, ibilgailu 1 zerbitzuaren koordinatzaile bakoitzarentzat eta 14 zaintza-dorre izan beharko ditu. Lehen aldiz, gainera, puntuazio-irizpide gisa gehitu da flotaren zati batek ordezko erregaiak erabiltzea, zerbitzu horretan ere mugikortasun iraunkorra sustatzeko helburuarekin.
Lagundutako bainuari dagokionez, lizitazioan ezartzen denez, zerbitzu hori 11: 00etatik 19: 00etara bitartean emango da, lizitatzaileak bere proposamenean proposatu behar dituen 6 hondartzatan. Kontuan hartu beharko da hondartzak ahalik eta modu homogeneoenean aukeratu beharko direla kostalde osoan zehar, zerbitzua eremuetan ahalik eta ondoen banatu dadin. Enpresa adjudikaziodunaren langileek egin beharreko oinarrizko zereginak honako hauek izango dira: aulki anfibioen edo makuluen erabiltzaileei bainua hartzea erraztea; toldo, aldagela, bainugela edo dutxen eremuetara joaten laguntzea; eta autonomia nahikoa edo kanpoko laguntza duten pertsonei laguntza-materiala mailegatzea.
