Aldundiak 2021eko partidak handituko ditu koronabirusari aurre egiteko

Diru-sarreren jaitsiera konpentsatzeko, Aldundiak 294,3 milioi eurotan handituko du bere zorpetzea, 2020ko aurrekontuarekin alderatuta, eta horri esker, bederatzi foru sailek aurten baino 75,2 milioi euro gehiago izango dituzte. % 5,9ko igoera horrek Sailak erabilgarri duen zenbatekoa handituko du 2021ean; muga berria 1.358,8 milioi eurokoa da.

Unai Rementeria Ahaldun Nagusiak azaldu duenez, kopuru horrekin, Aldundiak Bizkaia Aurrera planak hasitako zereginari jarraitutasuna ematen dion aurrekontu bat diseinatu du. Zentzu horretan, adierazi du aurrekontuak indartu egiten duela Aldundiari edozein koiunturari aurre egitea ahalbidetuko dion egitura, lau jarduketa-ardatz handiak identifikatuz. Ardatz bakoitzak Bizkaiak dituen trantsizio handietako bati erantzuten dio, eta trantsizio horiek, aldi berean, gizarte aurreratu guztiek dituzten lau erronka garrantzitsu dira:

• Trantsizio soziosanitarioa; zaintza modernoago, eraginkorrago eta espezializatuagoa behar duten pertsonei arreta emateko eredu baterantz. Alor honetan sartzen diren partidak 10,2 milioi eurokoak dira, eta horien artean Etxetic zentroen sarea nabarmentzen da. Rementeriak aurreratu duenez, Bizkaiak 4,8 milioi inbertituko ditu datorren urtean sei Etxetic zentro irekitzeko; honela, 2023an, guztira 22 zentro egongo dira. Halaber, ardatz honetan sartzen dira Urduliz dorrean Nagusi Intelligence Center irekitzeko partidak edo eremu soziosanitarioko zaintzaileentzako prestakuntza-plana.

• Mugikortasun iraunkorrago bateranzko trantsizioa; non metroa eta trena garraio publikoaren ardatz izango baitiren eta oinezko eta bizikleta bidezko joan-etorrien aldeko apustua egingo baiten. Esparru horretan, guztira, 55,7 milioi euroko inbertsioak egingo dira. 2021eko aurrekontuak bidegorri berrietan jarduketak egitea aurreikusten du; hala nola, Zornotza eta Durango arteko Bizkaiko lehenengo bidegorria, Bakio eta Bermeo arteko bide berdea eta Bilbo eta Txorierri arteko Lezamako Bide Zaharra.

• Trantsizio digitala. 10,8 milioi euroko partidak barne hartzen ditu, banda zabala lurralde osora zabaltzeko, ETEak eta tokiko merkataritza digitalizatzeko edo profil digitalak sortzeko xedaturiko Bizkaiko 42. Eskola abian jartzeko. Era berean, ardatz honetan kokatzen da Batuz-en hedapena, iruzur fiskalaren aurka borrokatzeko eta zergadunari laguntza emateko tresna.

• Trantsizio energetikoa; energia berriztagarri eta ez-kutsatzaileetarantz; trantsizio energetikoaren xedea da Bizkaia hidrogenoari eta banaketa elektrikoko sare adimendunei dagokienez erreferente bihurtzea Europan. Ardatz honek 10,3 milioi euroko inbertsioak egiten ditu Energy Intelligence Centerren edo Automotive Intelligence Centerren.

Unai Rementeriak adierazi du trantsizio horietan aurrera egiten jarraitzea ezin utzizko helburu bihurtu dela. Aurrera azkar eginez gero, Bizkaiak Euskadiko lokomotorra eta Europako aktore garrantzitsua izaten jarraitu ahal izateko giltzarri diren esparruetan kokatzeko aukera izango du.

DIRU-SARRERAK % 6 JAITSI DIRA

Jose Maria Iruarrizaga Ogasun eta Finantza diputatuak aurrekontuaren ildo nagusiak azaldu ditu; izan ere, zerga itunduek 7.403 milioi euro bilduko dituztela aurreikusi du. 2020ko aurrekontuarekin alderatuta, diru-sarreren iturri nagusian eman den % 9,8ko beherakada zorpetze handiago batekin konpentsatuko da, 410,3 milioi eurokoa izango dena. Horrela, aurrekontuaren zenbateko osoa 2020koa baino % 6 txikiagoa izango da.

Zorra 294 milioi euro handiagoa izango da eta, besteak beste, garraio publikoaren defizitak estaltzeko bideratuko da: 17 milioi Bizkaibusera eta 12 milioi Metro Bilbaora. Halaber, Rementeriak aurreratu duenez, Aldundiak 60 milioi euroko zorra ordainduko du kopuru hori Bizkaiko 112 udalen zerbitzura jartzeko. Horrela, udal-finantzaketarako partida ia ez da aldatuko 2020ko aurrekontuarekiko. Bizkaiko 2021erako aurrekontuak 916,7 milioi euro bideratuko ditu lurraldeko udaletara.

EUSKO JAURLARITZAREKIKO EKARPENA % 8,4 MURRIZTU DA

Udal finantzaketaz gain, Aurrekontuen Proiektuko gastuen kapituluan beste erakunde batzuk finantzatzeko partidak jasotzen dira, eta zenbateko handiena Eusko Jaurlaritzari egindako ekarpenena da, 4.858,9 milioi eurokoa. Partida hori % 8,4 jaitsi da 2020ko aurrekontuarekin alderatuta. Estatuarentzako Kupoak ere behera egin du, ia heren bat; 2020an 383,7 milioi eurokoa izango baita. Jaitsiera hori 2020ko Kupoaren likidazioan aurreikusitako doikuntzaren (Bizkaiaren aldekoa) eta Estatuak 2021eko ekitaldian aurreikusitako bilketaren jaitsiera handiagoaren ondorioz eman da.

Bestalde, Bizkaiko Batzar Nagusien finantzaketa-partida % 5,2 handitu da eta langile-gastuak % 1 hazi dira, 234,6 milioi euroraino. Amortizazio-gastuak eta kredituen interesak % 26,4 igo dira, 206,7 milioi euroraino, izan ere, 2021ean hasi baitziren ordaintzen 2020an Covidaren krisiari aurre egiteko onartutako zorpetzearen lehen epeak.

GIZARTE EKINTZAK BERE GAIN HARTZEN DU SAILAK ERABILGARRI DUEN ZENBATEKOAREN % 43A

Foru Aldundiko bederatzi sailek 1.358,8 milioi euro izango dituzte 2021ean, eta horietatik, Gizarte Ekintzak 585 milioi euro kudeatuko ditu. Sail honen aurrekontua 20,1 milioi eurotan hazi da, 2020koarekin alderatuta. Erantsitako taulan zehazten dira foru-sail bakoitzak izango dituen aurrekontuak, bai eta 2020ko aurrekontuarekiko aldaketa ere.

BATZAR NAGUSIETARA BIDALTZEA, LEGEBILTZARREAN IZAPIDETZEKO

Onartu ondoren, Foru Aldundiak 2021eko Aurrekontu Orokorren proiektua igorriko die Bizkaiko Batzar Nagusiei, Legebiltzarrean izapidetu dezaten.