Getxo. Getxoko Wanted Ideia Lehiaketako bosgarren edizioak badu irabazlerik. Lehenengo saria, Ruth San Cristobal Garamendik, Blanca Garate Sacristanek eta Hugo Blanc Ojedak sustatutako Amesten proiektuak irabazi du, eta bigarrena, Garazi Basterretxea Bareak, Jone Ibarretxe de la Calek eta Irati Astobieta Lakontzak aurkeztutako Book Trailer proiektuak eskuratu du. Lehiaketa Getxoko Udalaren Gazteria Zerbitzuak antolatutakoa da eta bertan 21 lan aurkeztu dira aurten.
Txapelketa irabazi duen Amesten egitasmoaren helburua aniztasun funtzionala duten haurrei eta haien familiei Getxoko kirol jardueretan parte hartzeko erraztasunak ematen saiatzea da. Zehazkiago, judo eta dantzan. Horretarako errealitate areagoturako tresna bat erabiliko da. Horri esker parte-hartzaileak kirol horretako mugimenduetan trebatzeko aukera izango du, jarduera errealera jo aurretik. Proiektu horren aurrekontua 6.900 eurokoa da. Horixe izango da, hain zuzen ere, jasoko duen saria. Horretaz aparte, 10 orduko aholkularitza profesionala ere jasoko du sari gisa.
Bigarren saria irabazi duen Book Trailer proiektuaren helburu nagusia euskaraz irakurtzeko zaletasuna bultzatzea da. Horretarako lehiaketa txiki bat antolatu nahi dute Getxoko DBHko 2. mailako gazteen artean. Parte hartzeko gazte bakoitzak book trailer txiki bat egin beharko du (liburu bat zertan datzan azaltzeko bideo txiki bat). Proiektu horrek 3.100 euro jasoko ditu sari modura eta, baita ere, 10 orduko aholkularitza profesionala.
Bi proiektuok abiatu eta gauza-tzeko, urtebete izango dute susta-tzaileek eta urtarril honetan bertan hasiko dira.
