Mario Larrinaga Mochalesen 'Camino a Bilbao' izeneko lana izango da abuztuaren 16tik 24ra bitartean ospatuko den Aste Nagusiaren irudia. Aurkezpena gaur goizean egin da Udaletxean, eta bertan Berdintasun eta Jaietako zinegotziak Itziar Urtasunek iragarri du irabazlearen proposamena, lehiaketako epaimahaiarekin batera. “Gure Aste Nagusiaren espirituarekin bat datorren kartela da: inklusiboa, anitza eta munduari irekia”, nabarmendu du Urtasunek. Kartel irabazleak botoen % 43,77 jaso du, sei lan finalisten artean.
Guztira, 222 proposamen aurkeztu dira lehiaketara: 72 Bilbokoak, 72 Euskadiko beste herrietakoak, 59 Estatukoak, eta 19 beste herrialdetakoak. Diseinu grafikoko profesionalek eta zaleek ia parekatuta parte hartu dute.
Hautaketa sistema misto baten bidez egin da: herritarrek online bozkatu ahal izan dute Bilboko Udalaren webgunean, edo aurrez aurre Abandoko Udal Zentroan, ekainaren 9tik 15era bitartean.
Epaimahaikideek, bestalde, ikuspegi tekniko eta artistikoa jarri dute erabakian. Aurten, hainbat esparrutako pertsonek osatu dute: Itziar Urtasun, Jai Batzorde Mistoaren presidentea eta Berdintasun eta Jaietako zinegotzia; Asier Abaunza eta Garazi Perea zinegotziak; Alicia Fernández, Rekalde Aretoaren zuzendaria; Alberto Salcedo, Bilbao Arteko ordezkaria; Susana Alaguero, Alde Zaharreko Merkatarien Elkarteko arduraduna; Andoni Calvo kazetaria; eta Bilboko Konpartsen ordezkaria Lorea Ureta. Horrez gain, edizio honetan aditu gonbidatu batzuk izan dira: Borja Sanz, Deustuko Unibertsitateko Ingeniaritza Fakultateko irakaslea eta Adimen Artifizialaren erabilerari buruzko aholkularia; eta Alba Gutierrez, Bilbon bizi den murtziar jatorriko diseinatzaile eta tatuatzailea.
Irabazle izan den lana bere inpaktu bisualagatik, teknikagatik eta Aste Nagusi anitz, alai eta ordezkatzaile bat islatzeko gaitasunagatik nabarmendu da. Egileak 3.000 euroko saria jasoko du.
